ԵԱՏՄ-ն սակագնային արտոնություն է տրամադրել 2026 թվականին խոշոր եղջերավոր անասունների մսի ներմուծման համար
2 րոպեի ընթերցում
Եվրասիական տնտեսական հանձնաժողովը 2026 թվականին անդամ երկրների համար խոշոր եղջերավոր անասունների մսի ներկրվող որոշ տեսակների վրա մաքսատուրքից ազատման տեսքով սակագնային արտոնություն է տրամադրել:
«Արմենպրես»-ի հաղորդմամբ՝ սահմանված են հետևյալ առավելագույն ծավալները՝ Հայաստանի համար՝ մինչև 7,5 հազար տոննա, Բելառուսի համար՝ մինչև 7,5 հազար տոննա, Ղազախստանի համար՝ մինչև 5 հազար տոննա, Ղրղզստանի համար՝ մինչև 5 հազար տոննա և Ռուսաստանի համար՝ մինչև 100 հազար տոննա:
ԵՏՀ առևտրի նախարար Անդրեյ Սլեպնյովը որոշման հետ կապված նշել է, որ մաքսային կարգավորման այս միջոցը հանդիսանում է հավասարակշռված որոշում, որն իր նպատակային բնույթի շնորհիվ կաջակցի մսի վերամշակման ոլորտին:
«Այն չի ազդի ներքին շուկայում տավարի մսի գնագոյացման վրա և չի ստեղծի լրացուցիչ ռիսկեր մսի արտադրության ոլորտում ներդրումային նախագծերի իրականացման համար»,- ասել է նախարարը և հավելել, որ հաշվի առնելով անցյալի փորձը՝ համապատասխան սակագնային արտոնությունների կիրառումը թույլ է տվել բնակչության համար ապահովել մսամթերքի մատչելիությունը և զսպել սպառողական գների աճի տեմպերը:
Նշենք, որ խոշոր եղջերավոր անասունների մսի ներկրումը Միության երկրներ հիմնականում իրականացվում է Լատինական Ամերիկայի երկրներից և Հնդկաստանից: Որոշումն ուժի մեջ կմտնի պաշտոնական հրապարակման օրվանից 10 օրացուցային օր անց և կտարածվի 2026 թվականի հունվարի 1-ից ծագած իրավահարաբերությունների վրա: