1 րոպեի ընթերցում
Իրանի քաղաքներում պայթյունների նոր ալիք է սկսվել՝ Թավրիզում, Դեզֆուլում, Նեհավենդում և Կանգավարում, ինչպես նաև Խարկ կղզում։
«Արմենպրես»-ի հաղորդմամբ՝ այս մասին գրում է Fars լրատվական գործակալությունը։
Վերոնշյալ բոլոր քաղաքները երկրի արևմտյան մասում են։
Փետրվարի 28-ի առավոտյան Իսրայելի արտաքին գործերի նախարարությունը հայտարարել էր, որ Իսրայելը կանխարգելիչ հարված է հասցրել Իրանին՝ Իսրայելին սպառնացող վտանգը չեզոքացնելու համար։ Իրանական լրատվամիջոցներն էլ հայտնել են Թեհրանում, Սպահանում և մի շարք այլ քաղաքներում պայթյունների մասին։
Իրանում նշել են, որ պատրաստվում են պատասխան հարված հասցնել Իսրայելին։
Արևմտյան որոշ լրատվամիջոցներ հաղորդել էին, որ ԱՄՆ-ն նույնպես ներգրավված է Իրանի դեմ գործողություններում։ Ավելի ուշ ԱՄՆ նախագահ Դոնալդ Թրամփը հայտարարեց ԱՄՆ-ի կողմից Իրանի դեմ լայնածավալ ռազմական գործողություններ սկսելու մասին։ Թրամփի խոսքով՝ «ռազմական գործողությունների նպատակը ամերիկյան ժողովրդին Իրանի ռեժիմի կողմից սպառնալիքի չեզոքացումն է»։ Թրամփը հայտարարել է, որ ոչնչացնելու է Իրանի հրթիռներն ու ռազմածովային նավատորմը՝ շեշտելով, որ Իրանը երբեք չպետք է միջուկային զենք ունենա։