2 րոպեի ընթերցում
Ռուսաստանի Դաշնությունում Ֆինլանդիայի դեսպան Մարյա Լիվալան կանչվել է ՌԴ արտաքին գործերի նախարարություն, որտեղ նրան բողոքի նոտա է ներկայացվել։
«Արմենպրես»-ի հաղորդմամբ՝ այս մասին նշված է Ռուսաստանի ԱԳ նախարարության տարածած հաղորդագրության մեջ։
Նշվում է, որ բողոքի նոտան Ֆինլանդիայի դեսպանին է ներկայացվել՝ կապված Հելսինկիում ՌԴ դիվանագիտական առաքելության դիմաց Ռուսաստանի դրոշը այրելու հանգամանքի հետ։
«Ռուսաստանում Ֆինլանդիայի դիվանագիտական առաքելության ղեկավարին կոշտ բողոք է ներկայացվել փետրվարի 24-ին Ֆինլանդիայում Ռուսաստանի դեսպանատան դիմաց տեղի ունեցած սադրիչ գործողության կապակցությամբ, որի ընթացքում անհայտ անձինք այրել են Ռուսաստանի Դաշնության պետական դրոշը»,-ասված է հրապարակված հայտարարության մեջ։
ՌԴ արտաքին գերատեսչության փոխանցմամբ՝ Մոսկվան դժգոհություն է արտահայտել, որ Ֆինլանդիայի իրավապահ մարմինների աշխատակիցները, որոնք պատասխանատու են եղել միջոցառման անվտանգությունն ու հասարակական կարգը ապահովելու համար, չեն կարողացել կանխել հանցագործությունը՝ այդպիսով, ըստ էության, արդարացնելով դրա կատարումը:
Բացի այս, Ռուսաստանի ԱԳՆ-ն ֆինլանդական կողմին հորդորել է անհապաղ անհրաժեշտ միջոցներ ձեռնարկել՝ մեղավորներին բացահայտելու և պատասխանատվության ենթարկելու, ինչպես նաև ապագայում Ռուսաստանի դեսպանատան դեմ նմանատիպ գործողությունները կանխելու համար: