Փաշինյանն ընտրություններին ընդառաջ ապատեղեկատվական արշավի դեմ պայքարը պատկերացնում է ժողովրդի հետ անմիջական հաղորդակցության միջոցով
2 րոպեի ընթերցում
Հայաստանի վարչապետ Նիկոլ Փաշինյանը երկրում սպասվող խորհրդարանական ընտրություններին ընդառաջ տարբեր շրջանակների կողմից տարածվող ապատեղեկատվության դեմ պայքարը պատկերացնում է ժողովրդի հետ անմիջական հաղորդակցության, անմիջական ու ազնիվ երկխոսության միջոցով։
«Արմենպրես»-ի փոխանցմամբ՝ Հայաստանի վարչապետն այդ մասին ասել է Լեհաստանի միջազգային հարաբերությունների ինստիտուտում օտարերկրյա դեսպանների, դիվանագետների և վերլուծական կենտրոնների ներկայացուցիչների հետ հանդիպման ժամանակ՝ պատասխանելով հարցին, թե ինչպե՞ս է պատրաստվում Հայաստանի կառավարությունը պայքարել երկրում սպասվող խորհրդարանական ընտրություններին արտաքին հնարավոր միջամտությունների ու տարածվող ապատեղեկատվության դեմ։
«Հայաստանը ժողովրդավարական պետություն է։ Մեր ժողովուրդը հնարավորություններ կունենա ժողովրդավար ճանապարհով որոշելու մեր երկրի ապագան։ Իհարկե, բազմաթիվ ռիսկեր կան, ես գիտեմ, որ ասեկոսեներ կան, պնդումներ և այլն, որոշակի գործելակերպեր, ահռելի ապատեղեկատվություն, որին մենք հիմա բախվում ենք։
Բայց մյուս կողմից, ինչպե՞ս վարվել։ Ինձ համար մնում է մի բան՝ անմիջական հաղորդակցության մեջ լինել մեր ժողովրդի, մեր հասարակության հետ, հնարավորինս թափանցիկ լինել, հնարավորինս ազնիվ ու անկեղծ լինել, անմիջական խոսել։
Ցանկացած քաղաքական գործչի համար ամենակարևոր բանն է հնարավորինս համոզիչ լինելը»,- ասել է ՀՀ վարչապետը։
Հայաստանում խորհրդարանական հերթական ընտրությունները տեղի կունենան 2026 թվականի հունիսի 7-ին։