1 րոպեի ընթերցում
Նիդեռլանդների հարավում գտնվող Բլեսկենսգրաաֆ քաղաքում ապաստան խնդրողների համար կենտրոն կառուցելու դեմ բողոքի ցույցը փետրվարի 24-ի երեկոյան վերաճել է անկարգությունների և իրավապահների հետ բախումների։ «Արմենպրես»-ի փոխանցմամբ՝ այս մասին հաղորդել է RTV Rijnmond հեռուստաընկերությունը։
Ոստիկանության տվյալներով՝ բողոքը սկսվել է փետրվարի 24-ի երեկոյան, երբ Նիու Լեկեռլանդից առնվազն 150 մեքենա է ժամանել «Ո՛չ փախստականների կենտրոնին» մակագրությամբ պաստառներով։
Սկզբում ակցիան խաղաղ է անցել, սակայն իրադրությունը սրվել է Բլեսկենսգրաաֆում, Նիու Լեկեռլանդում և Արկելում փախստականների կենտրոնների համար հնարավոր տարածքների հարցի շուրջ խորհրդի նիստի ժամանակ, երբ ցուցարարները փորձել են մտնել շենք։
Բլեսկենսգրաաֆի քաղաքապետարանի դիմաց ցուցարարները սկսել են ոստիկանության ուղղությամբ հրավառ նյութեր և ապակիներ ու քարեր նետել։ Ամբոխը ցրելու համար գործի են դրվել ոստիկանության հատուկ ջոկատներ։
Քաղաքապետը դադարեցրել է նիստը և ցուցարարներից պահանջել ցրվել, ինչից հետո իրադրությունը կայունացել է։ Ոստիկանության տվյալներով՝ միջադեպի հետևանքով ոչ ոք չի տուժել, ձերբակալություններ չեն եղել։