2 րոպեի ընթերցում
Հակակոռուպցիոն դատարանը 2026 թվականի հունվարի 22-ի վճռով բավարարել է ՀՀ գլխավոր դատախազության պետական շահերի պաշտպանության վարչության հայցադիմումը։ «Արմենպրես»-ի հաղորդմամբ՝ այս մասին տեղեկացրին ՀՀ գլխավոր դատախազության հանրային կապերի բաժնից։
Նշվում է, որ վճռի օրինական ուժի մեջ մտնելուց հետո Արտաշատ խոշորացված համայնքին կվերադարձվի Մխչյան գյուղում գտնվող՝ 8.9 հա մակերեսով հողամասը։
Գլխավոր դատախազության պետական շահերի պաշտպանության վարչությունը հայցադիմումով պահանջել էր անվավեր ճանաչել նշված հողամասի օտարման վերաբերյալ 2004 թվականի սեպտեմբերի 22-ի աճուրդը և կիրառել դրա անվավերության հետևանքները։
Մասնավորապես, դատարանից պահանջվել էր անվավեր ճանաչել Մխչյանի գյուղապետի և ՀՀ նախկին վարչապետ Հովիկ Աբրահամյանի որդի Արգամ Աբրահամյանի միջև 2004 թվականի նոյեմբերի 2-ին կնքված հողամասի առուվաճառքի պայմանագիրը, անվավեր ճանաչել Արգամ Աբրահամյանի անվամբ 2004 թվականի նոյեմբերի 4-ին կատարված սեփականության իրավունքի պետական գրանցումը, անվավեր ճանաչել Արգամ Աբրահամյանի և Հովիկ Աբրահամյանի միջև 2005 թվականի մարտի 10-ին կնքված նվիրատվության պայմանագիրը, անվավեր ճանաչել այդ պայմանագրի հիման վրա Հովիկ Աբրահամյանի անվամբ կատարված սեփականության իրավունքի պետական գրանցումը։