Հայաստան-Թուրքիա կարգավորման գործընթացում առաջընթացը կօգնի Հայաստան-Ադրբեջան գործընթացին․ Ռուբինյան
2 րոպեի ընթերցում
Հայաստան-Թուրքիա կարգավորման գործընթացում առաջընթացը ոչ միայն չի վնասի Հայաստան-Ադրբեջան գործընթացին, այլ նաև կօգնի և նոր ազդակ կհաղորդի դրան։
«Արմենպրես»-ի հաղորդմամբ՝ այս մասին ԱԺ-ում լրագրողների հետ ճեպազրույցում նշել է ԱԺ փոխնախագահ Ռուբեն Ռուբինյանը՝ անդրադառնալով այն հանգամանքին, որ Թուրքիան շարունակում է Հայաստան-Թուրքիա կարգավորման գործընթացը կապել Երևանի ու Բաքվի միջև ընթացող գործընթացի հետ։
«Մեր դիրքորոշման մեջ բան չի փոխվել․ Հայաստան-Թուրքիա հարաբերությունների կարգավորման գործընթացը և Հայաստան-Ադրբեջան գործընթացը տարբեր գործընթացներ են, բայց, քանի որ նույն տարածաշրջանում ենք, կարող են փոխազդել միմյանց վրա։ Մենք կարծում ենք, որ Հայաստան-Թուրքիա կարգավորման գործընթացում առաջընթացը ոչ միայն չի վնասի Հայաստան-Ադրբեջան գործընթացին, այլ նաև կօգնի և նոր ազդակ կտա»,-նշեց ԱԺ փոխխոսնակը։
Նա ընդգծեց, որ չի կարելի նաև չնկատել, որ Հայաստան-Ադրբեջան գործընթացում ահռելի առաջընթաց կա՝ օգոստոսի 8-ի հռչակագիրը խաղաղության վերաբերյալ, երկաթգծի առնվազն մասնակի ապաշրջափակումը և այսպես շարունակ։
«Ընդհանուր առմամբ, կարծում եմ՝ գործընթացները դրական ուղղությամբ են գնում, և որոշ արդյունքներ արդեն տեսնում ենք, իսկ որոշ արդյունքներ կտեսնենք»,-ասաց Ռուբինյանը։