Ճապոնիան և Իտալիան համաձայնել են համագործակցել հանքանյութերի, անվտանգության և տիեզերքի ոլորտներում

Ճապոնիայի վարչապետ Սանաե Տակաիչին հայտարարել է, որ իր իտալացի գործընկեր Ջորջիա Մելոնիի հետ համաձայնության է եկել ամրապնդել կարևորագույն հանքանյութերի մատակարարման շղթաները, խորացնել ռազմավարական գործընկերությունը, ընդլայնել կապերը տարբեր ոլորտներում։ Ինչպես «Արմենպրես»-ը տեղեկանում է Kyodo գործակալությունից, այս մասին Տակաիչին հայտարարել է Մելոնիի հետ համատեղ մամուլի ասուլիսում։

Նշվում է նաև, որ Ճապոնիան և Իտալիան, որոնք երկուսն էլ Մեծ յոթնյակի անդամներ են, որոշել են իրենց ներկայիս ռազմավարական գործընկերությունը բարձրացնել հատուկ ռազմավարական գործընկերության՝ տարբեր ոլորտներում, այդ թվում՝ անվտանգության և մշակույթի ոլորտներում կապերը ամրապնդելու համար։

Երկու ղեկավարները մամուլի ասուլիսում նաև հաստատել են, որ Ճապոնիան և Իտալիան կստեղծեն խորհրդակցական մարմին՝ տիեզերքում համագործակցությունը խթանելու համար։

«Քանի որ միջազգային հանրությունը բախվում է բարդ ճգնաժամի, և Հնդկախաղաղօվկիանոսյան տարածաշրջանի շուրջ ռազմավարական միջավայրը դարձել է լուրջ, նույն ըմբռնումներն ունեցող երկրների միջև սերտ համագործակցությունն ավելի կարևոր է դարձել, քան երբևէ», - ասել է Տակաիչին։

Ըստ հրապարակման՝ Ճապոնիան և Իտալիան կիսում են մտահոգությունները՝ կապված Չինաստանի հետ, որը հազվագյուտ մետաղների արտադրության ոլորտում գերիշխող դեր ունի։

Բացի այդ, Kyodo-ն նշում է, որ Տոկիոն և Հռոմն ակտիվացնում են պաշտպանական համագործակցությունը Հնդկախաղաղօվկիանոսյան տարածաշրջանում Պեկինի աճող ռազմական ազդեցության և Ռուսաստանի կողմից Ուկրաինայում ռազմական գործողություններ ծավալելու ֆոնին՝ համարելով, որ տարածաշրջանում և Եվրաատլանտյան տարածաշրջանում անվտանգությունը կապված են միմյանց հետ։

Երկու երկրներն ունեն համատեղ եռակողմ նախագիծ Մեծ Բրիտանիայի հետ՝ մշակելու նոր սերնդի կործանիչ, որը նրանք նպատակ ունեն տեղակայել մինչև 2035 թվականը։

Ճապոնիայի կառավարության պաշտոնյաների խոսքով՝ այս տարի երկկողմ դիվանագիտական ​​հարաբերությունների 160-ամյակի կապակցությամբ երկու կառավարությունները համատեղ հայտարարություն են պատրաստում։