Փաշինյանն ակնկալում է, որ իր մասնակցությամբ առաջիկա պատարագի ժամանակ չի հնչի Գարեգին Բ կաթողիկոսի անունը
2 րոպեի ընթերցում
Հայաստանի վարչապետ Նիկոլ Փաշինյանը վերահաստատել է, որ դեկտեմբերի 28-ին Գառնիի Սուրբ Աստվածածին եկեղեցում մասնակցելու է պատարագի՝ ակնկալիք հայտնելով, որ պատարագի ժամանակ չի հնչի Ամենայն հայոց Գարեգին Բ կաթողիկոսի անունը։
«Դեկտեմբերի 28-ին, այսինքն՝ վաղը, Գառնիիի Սուրբ Աստվածածին եկեղեցում կմասնակցեմ սուրբ և անմահ պատարագի։ Այստեղ էլ իմ ակնկալիքն այն է, որ Կտրիճ Ներսիսյանի անունը չհնչի պատարագի ժամանակ՝ նախկինում բերված հիմնավորումներով և պատճառներով։ Ի դեպ, կան մարդիկ, որոնք ասում են, որ երբ տարբեր եկեղեցիներում պատարագի են մասնակցում և հնչում է Կտրիճ Ներսիսյանի անունը, ցանկություն ունեն իրենց բողոքն արտահայտել հենց այդ պահին և հարցնում են՝ արդյոք նման բան կարելի՞ է և թույլատրելի՞ է։ Ես կարծում եմ, որ, այո, նման բան կարելի է և թույլատրելի է, որովհետև դա լեգիտիմ ակնկալիք է։ Երբ այն մարդիկ, որոնք իրենց հայտարարագրել են որպես վեհ և որպես որոշակի կանոններով ապրող և չեն կատարել դա, չեն կատարում դա և չեն էլ պատրաստվում առերեսվել այդ փաստի հետ, մենք՝ Հայաստանյայց Առաքելական սուրբ եկեղեցու հետևորդներս, պետք է ոչ միայն վերաբերմունք ձևակերպենք այդ փաստի առիթով, այլ նաև պետք է արտահայտենք այդ վերաբերմունքը և ի վերջո այդ վերաբերմունքից բխող գործնական արդյունքների հասնենք»,- «Արմենպրես»-ի փոխանցմամբ՝ ասել է Փաշինյանը։
ՀՀ վարչապետ Նիկոլ Փաշինյանը տևական ժամանակ է, ինչ պատարագների է մասնակցում հանրապետության տարբեր բնակավայրերի եկեղեցիներում։ Նա հայտարարել է, որ պատարագներին մասնակցում է Հայ Առաքելական եկեղեցու բարենորոգման օրակարգի շրջանակներում, որը որդեգրել է որպես Հայ Առաքելական եկեղեցու հետևորդ։