2 րոպեի ընթերցում
Կամբոջան հայտնել է, որ թաիլանդական F-16 կործանիչները կրկին հարձակվել են երկրի վրա՝ ներխուժելով սահմանից մոտ 60 կիլոմետր հեռավորության վրա: «Արմենպրես»-ի փոխանցմամբ՝ այդ մասին հաղորդում է Khmer Times թերթը՝ հղում անելով Կամբոջայի ազգային պաշտպանության նախարարությանը:
Ըստ գերատեսչության՝ դեկտեմբերի 24-ի առավոտյան մոտավորապես ժամը 10:00-ին «Թաիլանդը F-16 կործանիչներով վեց ռումբ է նետել Կամբոջայի հյուսիս-արևմուտքի Բատամբանգի նահանգի Բանանի շրջանում»:
«Բնակիչները ստիպված են եղել փախչել Թաիլանդի օդային ագրեսիայից», - նշել են Պաշտպանության նախարարությունում:
Ավելի վաղ Khmer Times-ը հաղորդել էր, որ Կամբոջայի սահմանամերձ շրջանների վրա Թաիլանդի հրետանու և օդուժի հարվածների պատճառով ավերվել և ոչնչացվել են 111 մասնավոր տուն, հինգ դպրոց, երեք բժշկական կենտրոն, շուկա, պահեստներ, մի քանի հին տաճարներ և մեհյաններ, 11 վարչական շենք, հինգ հյուրանոց, մի քանի կամուրջ, բենզալցակայան և 28 ավտոմոբիլ:
Թաիլանդի և Կամբոջայի սահմանին բախումները հրազենի կիրառմամբ վերսկսվել են դեկտեմբերի 7-ին: Հոկտեմբերին Մալայզիայում ԱՄՆ նախագահ Դոնալդ Թրամփի միջնորդությամբ ձեռք բերված հրադադարի խախտման համար կողմերը մեղադրել են մեկը մյուսին։
Դեկտեմբերի 22-ին Կուալա Լումպուրում Հարավարևելյան Ասիայի երկրների արտգործնախարարները հանդիպում էին անցկացրել, որին մասնակցել էին նաև Թաիլանդի և Կամբոջայի արտգործնախարարները։ Համաձայնություն էր ձեռք բերվել, որ դեկտեմբերի 24-ին հանդիպում կկայանա երկու երկրների պաշտպանության նախարարների միջև։