Ալեքսանդր Սպենդիարյանի տուն թանգարանում բացվել է «Հին Երևան. Սպենդիարյանական վայրեր» ժամանակավոր ցուցահանդեսը

Ալեքսանդր Սպենդիարյանի տուն-թանգարանում դեկտեմբերի 23-ին  բացվել է «Հին Երևան. Սպենդիարյանական վայրեր» խորագրով ժամանակավոր ցուցահանդեսը։    

«Արմենպրես»-ի  թղթակցի հետ զրույցում Ալեքսանդր Սպենդիարյանի տուն-թանգարանի տնօրեն Մարինե Օթարյանը նշեց, որ ցուցահանդեսը նվիրված է երկու նշանավոր հոբելյանների՝ Ալեքսանդր Սպենդիարյանի Երևան տեղափոխվելու 100-ամյակին և նրա «Երևանյան էտյուդների» ստեղծման 100-ամյակին:                              

Ցուցադրության միջոցով այցելուներին կներկայացվի հին Երևանի մշակութային միջավայրը՝ Սպենդիարյանի կյանքի և ստեղծագործական ուղու համատեքստում:        

Հատուկ ուշադրություն է դարձվելու այն վայրերին, որոնք անմիջականորեն  առնչվել են մեծանուն կոմպոզիտորի երևանյան գործունեության շրջանին։                                

Ցուցադրության մեջ անդրադարձ կկատարվի  նաև Սուրբ Սարգիս եկեղեցուն, որի առաջնորդարանում  կոմպոզիտորին սենյակ է տրամադրվել ստեղծագործելու համար։ Ներկայացվելու են հիմնականում վավերագրական նյութեր և փաստաթղթեր՝տպագրության ձևաչափով, քանի որ խոշոր ձեռագրերը պահվում են տարբեր թանգարաններում։                                                                        

«Ցուցադրվելու են նաև մի քանի անձնական իրեր, արխիվային նյութեր, ինչպես նաև Ռաֆայել Պետրոսյանի «Սպենդիարյանը Երևանում» կտավի բնօրինակը։               Հատուկ ուշադրության կարժանանա հին Երևանի՝ ձեռքով նկարած քարտեզը. այնտեղ նշված են Սպենդիարյանի գործունեության հետ կապված վայրերը»,- նշեց թանգարանի տնօրեն Մարինե Օթարյանը։                                                                        

«Ցուցահանդեսը իրականացվում է գործընկեր «Քուադրում» ճարտարապետական արվեստանոցի նկարիչների, դիզայներների և ճարտարապետների աջակցությամբ՝ՀՀ կրթության, գիտության, մշակույթի և սպորտի նախարարության օժանդակությամբ։ Այն կգործի մեկ ամիս»,-եզրափակեց Մարինե Օթարյանը։  

Լուսինե Ջալալյան