Պուտինը ժամանել է Թուրքմենստան՝ մասնակցելու «Խաղաղության և վստահության տարվան» նվիրված ֆորումին
1 րոպեի ընթերցում
Ռուսաստանի նախագահ Վլադիմիր Պուտինը ժամանել է Թուրքմենստան, որտեղ կմասնակցի մի շարք միջոցառումների և կանցկացնի երկկողմ հանդիպումներ։
«Արմենպրես»-ի փոխանցմամբ՝ այս մասին հայտնում է «Ինտերֆաքս»-ը։
Ինչպես նախկինում հայտնել էր նախագահի օգնական Յուրի Ուշակովը, Ռուսաստանի առաջնորդը կմասնակցի Թուրքմենստանի մայրաքաղաք Աշխաբադում կայանալիք Խաղաղության և վստահության միջազգային տարվան նվիրված ֆորումին։
ՌԴ նախագահի մամուլի քարտուղար Դմիտրի Պեսկովը պարզաբանել է, որ ֆորումի շրջանակներում Պուտինը երկկողմ հանդիպումներ կունենա Թուրքմենստանի նախագահ Սերդար Բերդիմուհամեդովի, Իրանի և Իրաքի նախագահներ Մասուդ Փեզեշքիանի և Աբդ ալ-Լատիֆ Ռաշիդի, ինչպես նաև Պակիստանի վարչապետ Շահբազ Շարիֆի հետ։ Նախատեսվում է նաև հանդիպում Թուրքիայի նախագահ Ռեջեփ Թայիփ Էրդողանի հետ։
Այս օրերին Թուրքմենստանում է նաև ՀՀ նախագահ Վահագն Խաչատուրյանը։