Կառավարությունը 14 համայնքի 27 սուբվենցիոն ծրագրի համաֆինանսավորման համար կհատկացնի 2 մլրդ 828 մլն դրամ
1 րոպեի ընթերցում
Կառավարության հերթական նիստում ՀՀ տարածքային կառավարման և ենթակառուցվածքների նախարար Դավիթ Խուդաթյանը ներկայացրեց համայնքների ենթակառուցվածքների զարգացմանն ուղղված 27 սուբվենցիոն ծրագրի համաֆինանսավորման նախագիծը։ «Արմենպրես»-ի հաղորդմամբ՝ նախագծով առաջարկվում է 14 համայնքի տրամադրել 2 մլրդ 828 մլն դրամ։
Խուդաթյանի խոսքով՝ այս գումարի հավանությամբ պետական բյուջեից արդեն հատկացված սուբվենցիոն համաֆինանսավորման ընդհանուր ծավալը կհասնի 21 մլրդ 59 մլն դրամի։
Նախարարն ընդգծեց, որ առաջիկայում սպասվում է նաև լրացուցիչ խոշոր հատկացում։
«Եվս մեկ հատկացում է լինելու, որը թույլ կտամ ասել՝ հսկայական ծավալի է լինելու։ Խոսքը շուրջ 10 միլիարդ դրամի մասին է։ Դա մեծ հավանականությամբ կընդգրկվի կառավարության հաջորդ նիստի օրակարգում»,-եզրափակեց Խուդաթյանը։