Ճարտարապետության և շինարարության Հայաստանի ազգային համալսարանը նպատակ ունի ցուցահանդեսով ներկայանալ Լեհաստանում

Ճարտարապետության և շինարարության Հայաստանի ազգային համալսարանում անցկացվեց  հերթական ցուցահանդեսը, որտեղ ներկայացվեցին «Էսքիզավորում դասընթացի շրջանակներում բուհի Դիզայնի ֆակուլտետի ուսանողների կատարած աշխատանքները։

«Արմենպրես»-ի հաղորդմամբ՝ ցուցահանդեսը, որը կրում է «Մի գծի պատմություն» խորագիրը, ՃՇՀԱՀ-ում անցկացվում է արդեն երկրորդ անգամ։

Դասընթացի յուրօրինակ արտացոլումը ներկայացնող ցուցահանդեսը տպավորեց ուսանողական վառ երևակայությամբ, գունեղ աշխատանքներով։

Դիզայնի ֆակուլտետի դեկան Արտաշես Մելիքյանի խոսքով՝ էսքիզավորումն ուսումնասիրվում  է ֆակուլտետի առաջին, երկրորդ կուրսերում։ 

«Դա հիմնական սկիզբն է, որով ուսանողը հասկանում է, թե ինչ է էսքիզի տեխնիկան, ինչը տալիս է հմտություն, ու դրանով ուսանողն ապագայում կարողանում է իր մտքերը փոխանցել թղթին՝ զգալով կոմպոզիցիոն, համաչափական, գունային  և այլ ասպեկտներ»,-նշեց դեկանը՝ հայտնելով, որ ցուցահանդեսին մասնակցում է շուրջ 120 ուսանող, իսկ ներկայացված աշխատանքների թիվը 1000-ից ավելի է։

Ըստ դեկանի՝ ցուցահանդեսը ոգևորում է ուսանողներին ուսումնական գործընթացում, ինչպես նաև ձևավորում ձգտում՝ իրենց ապագա աշխատանքներով բավարարելու ցուցահանդեսի պահանջները և նույնպես ներկայացված լինելու։

Ցուցահանդեսի ավարտին ֆակուլտետի համապատասխան մասնագիտական հանձնաժողովի կողմից ընտրվում են լավագույն աշխատանքներն ու հեղինակները, որոնց  տրամադրվում են վկայականներ՝ ինչպես մասնակցության, այնպես էլ  մրցանակային տեղ զբաղեցնելու վերաբերյալ։

Այդ ամենը, Մելիքյանի համոզմամբ, մեծ մոտիվացիա է այն ուսանողի համար, ով դեռ պետք է ինքնաարտահայտվի։

Անդրադառնալով ներկայացված աշխատանքները հետագայում այլ հարթակներում ներկայացնելուն՝ Մելիքյանն ընդգծեց՝ ցուցահանդեսը ֆակուլտատիվ դասընթացների շարքին է պատկանում և նպատակ են հետապնդում ուսանողի մեջ զարգացնել տվյալ ուղղության հմտությունը։ Այդուհանդերձ, մտահղացում կա համալսարանի օժանդակությամբ այն ներկայացնել որպես շրջիկ ցուցահանդես՝  խոշոր նախագծային կամ գեղարվեստական կրթօջախներում։ 

Ի դեպ, ցուցահանդեսը Լեհաստանում ներկայացնելու առաջարկ է եղել որտեղ գործընկերները հետաքրքրված են էսքիզավորման առարկայով։

«Մենք կապ ենք պահում, և եթե հաջողվի՝ այնտեղ ևս կներկայացնենք այս ցուցահանդեսը»,-հույս հայտնեց դեկանը։

Միջավայրի դիզայնի ֆակուլտետի 3-րդ կուրսի ուսանողուհի Էլեն Վարդանյանը ցուցահանդեսին մասնակցությունը բնութագրեց որպես ավելին անելու մոտիվացիա։ 

«Գնահատվում է մեր աշխատանքը, երկրորդ հայացքով ծանոթանում ենք մեր գործերին, ինչը ոգևորիչ է՝ հետագայում ավելի լավ ներկայանալու համար»,-եզրափակեց ցուցահանդեսի մասնակիցը՝ ցանկություն հայտնելով, որպեսզի ցուցահանդեսը ներկայացվի նաև այլ հարթակներում։