Հայաստանը և Ադրբեջանը ներկայումս ապրում են երկկողմ հարաբերությունների ամենախաղաղ ու կայուն շրջանը. Ադրբեջանի ԱԳ նախարար
2 րոպեի ընթերցում
Հայաստանը և Ադրբեջանը ներկայումս ապրում են երկկողմ հարաբերությունների ամենախաղաղ և կայուն շրջանը։ Ինչպես տեղեկացնում է «Արմենպրես»-ը, վկայակոչելով ադրբեջանական լրատվամիջոցները, Վիեննայում ԵԱՀԿ արտաքին գործերի նախարարների խորհրդի 32-րդ նիստում այս մասին հայտարարել է Ադրբեջանի ԱԳ նախարար Ջեյհուն Բայրամովը։
«Ադրբեջանը և Հայաստանը ներկայումս գտնվում են երկկողմ հարաբերությունների ամենախաղաղ և կայուն փուլում։ Կողմերը տարբեր ուղղություններով՝ կառավարական, խորհրդարանական և քաղաքացիական հասարակության մակարդակներում, ձեռնարկում են անհրաժեշտ քայլեր և իրականացնում կոնկրետ միջոցառումներ՝ խաղաղ գործընթացին լրացուցիչ խթան տալու նպատակով»,- ասել է Բայրամովը։
Ադրբեջանի ԱԳ նախարարը հայտարարել է, որ 2023-ի դեկտեմբերից արձանագրվել է զգալի առաջընթաց, ինչը հանգեցրել է օգոստոսի 8-ին Վաշինգտոնում կայացած պատմական խաղաղ գագաթնաժողովին։
Բայրամովը հիշեցրել է, որ գագաթնաժողովի ընթացքում, ԱՄՆ նախագահ Դոնալդ Թրամփի ներկայությամբ, ընդունվել է Հայաստանի և Ադրբեջանի ղեկավարների համատեղ հռչակագիրը, որով կողմերը հայտարարել են, որ հակամարտությունը մնացել է անցյալում։
Ադրբեջանի ԱԳ նախարարը նաև շեշտել է «Թրամփի ուղի» (TRIPP) նախագծի ռազմավարական նշանակությունը։
«Հաղորդակցությունների բացումը կօգնի ապահովել տարածաշրջանային խաղաղություն և տնտեսական զարգացում շատ ավելի լայն մասշտաբով»,– ասել է Ադրբեջանի արտաքին գործերի նախարարը։