Օպերային դիվա Ալբինա Շագիմուրատովան համերգով հանդես է եկել Երևանում

Հայաստանի ազգային ֆիլհարմոնիկ նվագախումբն օրերս հյուրընկալել է Գլինկայի անվան վոկալիստների XXVII միջազգային մրցույթի դափնեկիրներին՝ ժամանակների ականավոր սոպրանո Ալբինա Շագիմուրատովայի գլխավորությամբ (մրցույթի ժյուրիի նախագահ): Նրանց մասնակցությամբ «Արամ Խաչատրյան» համերգասրահում կայացած համերգը Շագիմուրատովայի և դափնեկիրների շրջագայության մի մասն է, որն այժմ տեղի է ունենում Ռուսաստանի տարբեր քաղաքներում, ինչպես նաև Բելառուսում և Ղազախստանում:

«Արմենպրես»-ի հաղորդմամբ՝  Գլինկայի հեղինակավոր մրցույթը, որն անցյալ դարում կազմակերպվել է Ռուսաստանում Իրինա Արխիպովայի անմիջական մասնակցությամբ, այժմ վերածնունդ է ապրում մի քանի տարվա մոռացությունից հետո: Մեծ երգչուհու հոբելյանական տարում հսկայական ջանքեր են գործադրվել միջազգային մակարդակով ցույց տալու նրա աշխատանքի պտուղները և ժամանակակից դասական երաժշտության կատարման լավագույն օրինակները:

Գլինկայի մրցույթում ավանդաբար փայլել և մրցանակների են արժանացել նաև հայազգի օպերային երգիչները՝ Գեղամ Գրիգորյան (1975), Արաքս Դավթյան (1979), Բարսեղ Թումանյան (1979):

Ալբինա Շագիմուրատովայի խոսքով՝ Գլինկայի մրցույթը, որպես մասնակից, իր առաջին մրցույթն է եղել։ «Ես Մոսկվայի կոնսերվատորիայի հինգերորդ կուրսի ուսանողուհի էի, Իրինա Արխիպովան ժյուրիի նախագահն էր։ Այն իմ առաջին մրցույթն էր ու առաջին մրցանակը։ Դա մեծ խթան էր կարիերայիս համար։ Իրինա Կոնստանտինովնայի հետ hանդիպումը, և նրա՝ դու կերգես ամբողջ աշխարհում և անպայման կմասնակցես Չայկովսկու մրցույթին խոսքերն օգնեցին հավատալ ուժերիս։ Գլինկայի և Չայկովսկու մրցույթները մեր երկրի երկու խոշոր մրցույթներն են, որոնք սկիզբ են առնում խորհրդային ժամանակներից։ Գլինկայի անվան վոկալիստների մրցույթը կարևոր դեր է խաղացել շատ անվանի երգիչների կայացման գործում, և սա մեր մեծ պատմությունն է»,-նշում է երգչուհին։

Նրա խոսքով՝ նոյեմբերի 28-ին Երևանում կայացած համերգը մեծ հաջողություն է ունեցել։ Դահլիճում ներկա են եղել ոչ միայն վոկալիստներ, երաժիշտներ, այլև հանդիսատես, որը մասնագիտական առումով կապ չունի արվեստի հետ. ներկա են եղել արտասահմանյան պատվիրակությունների և ՀՀ մշակույթի նախարարության ներկայացուցիչներ: «Շատ ուրախ եմ, որ այս մրցույթի անունը հնչեց հայկական հողի վրա։ Դահլիճը լեփ-լեցուն էր, ինչը շատ բանի մասին է խոսում։ Հատկապես ուրախալի է, որ ելույթ ունեցանք Հայաստանի ազգային ֆիլհարմոնիկ նվագախմբի 100-րդ հոբելյանական համերգաշրջանում: Նվագախմբին մաղթում եմ երկարակեցություն և բարգավաճում, միջազգային նշանակալի շրջագայություններ: Համերգին ռուսական և եվրոպական օպերաների հայտնի արիաներից և զուգերգերից բացի, նվագախումբը կատարեց Խաչատրյանի և Միրզոյանի ստեղծագործությունները: Զմայլվեցի այդ երաժշտությամբ. որքան նուրբ և խորապես հուզիչ է այն: Նվագախումբը շատ նրբազգաց էր և շատ զգայուն նվագակցում էր ինձ և իմ գործընկերներին: Սա, իհարկե, Էդուարդ Թոփչյանի մեծ վաստակն է: Երևանյան համերգն արդեն մեր երկրորդ հանդիպումն էր այս նուրբ, զգայուն և ուշադիր դիրիժորի հետ, նման երաժիշտի հաճախ չես հանդիպի: Ուրախ եմ մեր համագործակցության համար, մաղթում եմ և՛ մաեստրոյին, և՛ նվագախմբին շարունակական հաջողություններ»,-նշում է Շագիմուրատովան։

Հայաստանի ազգային ֆիլհարմոնիկ նվագախմբի գեղարվեստական ​​ղեկավար և գլխավոր դիրիժոր Էդուարդ Թոփչյանն էլ պատմում է, որ առաջին անգամ Ալբինա Շագիմուրատովային հանդիպել է 2022-ին՝ Դմիտրի Խվորոստովսկու փառատոնին: «Միասին ելույթ ունեցանք մեծ համերգային ծրագրով: Իհարկե, ես միշտ հիացել եմ նրա արվեստով, բայց այդ համերգն ինձ վրա անմոռանալի տպավորություն թողեց: Շագիմուրատովան օժտված է աստվածային գեղեցկության ձայնով, որին նա տիրապետում է ապշեցուցիչ, կատարյալ կատարողական վարպետությամբ, ինչը հազվադեպ հանդիպող երևույթ է մեր օրերում: Երբ ինձ առաջարկեցին նրան հյուրընկալել Երևանում, անմիջապես համաձայնեցի՝ հրաշալի համերգի և այս մեծ երգչուհու արվեստը կրկին հաղորդակցվելու ակնկալիքով: Վստահ էի, որ նրա ղեկավարությամբ ընտրված երգիչները, որոնք Գլինկայի անվան վոկալիստների միջազգային  մրցույթի հաղթողներ են, նույնպես հիանալի ելույթ կունենան, և ես չսխալվեցի»,-ընդգծում է Թոփչյանը։

Երևանյան համերգին Ալբինա Շագիմուրատովայից զատ բեմում են եղել նաև մրցույթի դափնեկիրներ Իվան Բորոդուլինը, Իոսիֆ Նիկիտենկոն, Միրոսլավ Մոլչանովը և Դանիլ Սախարովը: Ելույթ է ունեցել նաև Բելառուսի մեծ թատրոնի մեներգչուհի Դարյա Գորոժանկոն։