2 րոպեի ընթերցում
Լատվիայի կառավարությունը քննարկում է Ռուսաստան տանող երկաթուղու հատվածները լիովին ապամոնտաժելու հնարավորությունը։ Հարցն արդեն քննարկել են նախագահ Էդգարս Ռինկևիչսը և վարչապետ Էվիկա Սիլինան։ Այդ մասին տեղեկացնում է «Արմենպրես»-ը՝ վկայակոչելով Deutsche Welle-ն։
Մինչև 2025 թվականի վերջը Լատվիայի կառավարությունը, զինվորականների հետ համատեղ, կվերլուծի երկրի արևելքում երկաթուղային գծերի մի քանի հատվածների ապամոնտաժման հնարավորությունը, ինչպես նաև խորհրդակցություններ կանցկացնի Լիտվայի և Էստոնիայի հետ։ Ռինկևիչսն իր հերթին նշել է, որ այս հարցի վերաբերյալ ավելի շատ պարզություն է սպասվում հաջորդ տարվա սկզբին։
«Մենք չենք կարող բացառել ազգային պաշտպանության և անվտանգության ամրապնդման որևէ տարբերակ, սակայն նման որոշումները պետք է կայացվեն ինչպես աշխատանքի ժամկետները, այնպես էլ ծավալը որոշելուց, ինչպես նաև գնահատելուց հետո»,- ասել է երկրի նախագահը։
Նրա խոսքով՝ սոցիալական ցանցերում տվյալ հարցի շուրջ բանավեճը մինչ այժմ պարունակում է շատ հույզեր, բայց քիչ ռացիոնալություն։
Լատվիացի պաշտոնյաները չեն մանրամասնել, թե երկրի երկաթուղային գծի որ հատվածները կարող են ապամոնտաժվել։ Լատվիայի արևելքում դեպի Ռուսաստան ձգվում են երկու երկաթուղային միջանցքներ։