Հովհաննես Թումանյանի թանգարանը կազմակերպում է հեքիաթագիտության 15-րդ միջազգային գիտաժողովը

2025 թվականի դեկտեմբերի 26-27-ը Հովհաննես Թումանյանի թանգարանը կազմակերպում է հեքիաթագիտական 15-րդ միջազգային գիտաժողովը, որի թեմատիկ առանցքն այս անգամ հագուստն է հեքիաթներում։  

Գիտաժողովը տեղի կունենա Մատենադարանի փոքր դահլիճում։ 

Արդեն 15 տարի է՝ Թումանյանի թանգարանն անցկացնում է հեքիաթագիտական ամենամյա   գիտաժողով, քանի որ ունի համապատասխան մասնագիտացված բաժին։ Հեքիաթագիտության բաժինը ղեկավարում է  բանասիրական գիտությունների դոկտոր, պրոֆեսոր Ալվարդ Ջիվանյանը։ 

«Արմենպրես»-ի թղթակցի հետ զրույցում այս մասին հայտնեց Հովհաննես Թումանյանի թանգարանի տնօրեն Լուսինե Ղարախանյանը՝ նշելով, որ այս տարի ընտրվել է «Հեքիաթի հանդերձարանում» խորագիրը, որի թեմատիկայի առանցքն է՝ հագուստի խորհրդաբանությունը հեքիաթում, հագուստի պոետիկան բանահյուսական և հեղինակային պատումներում։ 

«Գիտաժողովին մասնակցելու են բազմաթիվ  հեքիաթագիրներ, գիտնականներ, ինչպես նաև հյուրեր Էստոնիայի Տարտու քաղաքից՝ ֆոլկլորիստներ,  հեքիաթի հագուստի պատմության մասնագետներ  և դիզայներներ։ Շատ հետաքրքիր գիտաժողով է լինելու»,-ասաց Թումանյանի թանգարանի տնօրենը։

 «2026 թվականին նախատեսվում է հրատարակել «Թումանյանը ժամանակակիցների հուշերում» գրքի երրորդ հատորը․ տարին թանգարանի համար կլինի հրատարակչական։  

Ծրագրվում է կատարելագործել նաև Հովհաննես Թումանյանի ստեղծած մանկական խաղերը դարձնել օնլայն և ներառել բջջային հավելվածներում, որպեսզի Թումանյանի թեմատիկ  խաղերը հասանելի դառնան ոչ միայն  Հայաստանում, այլև  աշխարհի տարբեր երկրներում։ 

Հովհաննես Թումանյանի թանգարանի շենքում այս պահին շինարարական աշխատանքներ են ընթանում, թանգարանը ժամանակավորապես տեղափոխվել և գործունեությունը շարունակում է Հրանտ Մաթևոսյանի մշակութային կենտրոն- թանգարանում։   

Լուսինե Ղարախանյանը նշում է՝ Հրանտ Մաթևոսյանի թանգարանում հնարավոր չէ շատ այցելուներ ընդունել, ինչի հետևանքով էլ թանգարանի այցելուների քանակը նվազել է։ 

«Բայց ծրագրերը, նախագծերը կյանքի են կոչվում մեծ սիրով, խանդավառությամբ և հիմնական շենք վերադարձի հավատով»,- ասաց Հովհաննես Թումանյանի թանգարանի տնօրենը։ 

Թանգարանի շենքում շինաշխատանքների ավարտի ժամկետը 1 տարի 6 ամիս է, այսինքն՝ այդքան ժամանակ թանգարանը իր գործունեությունը շարունակելու է Հրանտ Մաթևոսյանի թանգարանում։  

Լուսինե Ջալալյան