2 րոպեի ընթերցում
Ուկրաինայի էներգետիկայի նախարար Սվետլանա Գրինչուկը հրաժարական է տվել էներգետիկ ոլորտում կոռուպցիոն սկանդալի ֆոնին։
«Արմենպրես»-ի հաղորդմամբ՝ այս մասին Սվետլանա Գրինչուկը գրառում է կատարել «Ֆեյսբուք»-ի իր միկրոբլոգում։
«Ես հրաժարական եմ ներկայացրել։ Իմ պաշտոնը երբեք ինքնանպատակ չի եղել ինձ համար։ Իմ մասնագիտական գործունեության ընթացքում օրենքի խախտումներ չեն եղել։ Նման փաստեր սկզբունքորեն չեն կարող գոյություն ունենալ։ Ինչ վերաբերում է իմ անձնական հարաբերությունների վերաբերյալ ենթադրություններին, ապա այս թեմայով ցանկացած ենթադրություն անտեղի է», - նշել է նա։
Ուկրաինայի վարչապետ Յուլիա Սվիրիդենկոն Գերագույն Ռադային ներկայացրել է առաջարկ՝ պահանջելով Սվետլանա Գրինչուկի հրաժարականը էներգետիկայի նախարարի և Հերման Գալուշչենկոյի հրաժարականը արդարադատության նախարարի պաշտոնից:
Ռադայի պատգամավոր Յարոսլավ Ժելեզնյակը հայտարարել է, որ խորհրդարանը կքննարկի առաջարկը նոյեմբերի 18-ին:
Ավելի վաղ Ուկրաինայի կոռուպցիայի դեմ պայքարի ազգային բյուրոն լայնածավալ հատուկ գործողություն է սկսել էներգետիկայի ոլորտում կոռուպցիոն սխեմաները բացահայտելու համար: Գործակալությունը հրապարակել է խուզարկությունների ժամանակ հայտնաբերված պայուսակների լուսանկարներ, որոնք լի էին արտարժույթի կապոցներով, սակայն ճշգրիտ գումարը դեռևս չի բացահայտվել: