2 րոպեի ընթերցում
Հայաստանի ֆուտբոլի ազգային թիմի գլխավոր մարզիչ Եղիշե Մելիքյանը մեծ սպասելիքներ չունի աշխարհի առաջնության որակավորման փուլում Հունգարիայի դեմ Երևանում կայանալիք խաղից:
«Թիմը հոգեբանորեն պատրաստ է: Այո, կան կորուստներ, բայց նաև հնարավորություն կա խաղի մեջ տեսնելու հայտացուցակի մյուս ֆուտբոլիստներին: Սա շանս է նրանց համար: Նախորդ խաղերի համեմատ՝ 4-5 ֆուտբոլիստ վաղը չի լինելու, բայց ինձ համար սա լավ փորձություն է»,-«Արմենպրես»-ի հաղորդմամբ` լրագրողների հետ նախախաղային մամուլի ասուլիսի ժամանակ ասաց Մելիքյանը:
Վերջինիս խոսքով` ազգային հավաքականի յուրաքանչյուր ֆուտբոլիստ պատրաստ է Հունգարիայի դեմ խաղի ցանկացած ելքի:
«Մենք պատրաստ ենք թե՛ հաղթելու, թե՛ պարտվելու և թե՛ ոչ-ոքի արդյունքի, բայց մենք պատրաստ ենք պայքարելու: Նախորդ ամսվա պարտությունները մեզ համար միայն առիթ էին սխալները շտկելու համար: Չեմ վախենում պարտությունից:
Եթե անգամ չհաղթենք, ապա այս խաղերով կարող ենք ապագայի համար հարցեր լուծել»,-առանձնացրեց նա:
Ազգային թիմի գլխավոր մարզիչը նպատակ ունի Հունգարիայի դեմ երևանյան խաղում մեկնարկային կազմում ընդգրկել Հայաստանի առաջնությունում հանդես եկող ֆուտբոլիստների:
Հունգարիայի դեմ երևանյան խաղում Հայաստանի հավաքականին չի օգնի Տիգրան Բարսեղյանը, որը երեք խաղով որակազրկվել է Իռլանդիայի դեմ նախորդ տուրի խաղում մրցակցին գլխով հարվածելու պատճառով։ Հավաքականի առաջատարներից Լուկաս Սելարայանը հայտարարել է հավաքականում կարիերան ավարտելու մասին։ Հունգարիայի դեմ խաղին վնասվածքի պատճառով չի մասնակցի նաև Ուգոչուկվու Իվուն։