Ոչ պետական չհավատարմագրված բուհերի՝ մինչև 2003 թ. շրջանավարտները հնարավորություն ունեն ուսանողական իրավունքները վերականգնել հավատարմագրված բուհերում
2 րոպեի ընթերցում
Հայաստանի կրթության, գիտության, մշակույթի և սպորտի նախարարի հրամանով փոփոխություններ և լրացումներ են կատարվել ՀՀ կրթության և գիտության նախարարի 2011թ. նոյեմբերի 17-ի N 1242-Ն հրամանում, որով հաստատված է ՀՀ բարձրագույն ուսումնական հաստատություններում ուսանողների հեռացման (ազատման) և վերականգնման կարգը:
«Արմենպրես»-ի փոխանցմամբ՝ նախարարությունից հայտնում են, որ նախաձեռնությամբ կարգավորվում է ոչ պետական չհավատարմագրված բուհերի շրջանավարտների ուսանողական իրավունքների վերականգնման և ուսումնառության կազմակերպման գործընթացը:
Հաշվի առնելով այն հանգամանքը, որ մինչև «Կրթության մասին» օրենքը ուժի մեջ մտնելը (1999 թ. մայիսի 14-ը)՝ ՀՀ-ում բարձրագույն ուսումնական հաստատությունների և մասնագիտությունների հավատարմագրման ինստիտուտ ներդրված չի եղել, սույն կարգավորմամբ ոչ պետական չհավատարմագրված հաստատությունների՝ մինչև 2003 թ. ներառյալ շրջանավարտներին հնարավորություն է տրվում ուսանողական իրավունքները վերականգնել հավատարմագրված բուհերում:
Մասնավորապես՝ ամրագրվում է, որ ոչ պետական չհավատարմագրված հաստատությունների շրջանավարտները կարող են վերականգնվել բակալավրի կրթական աստիճանում հեռակա ուսուցմամբ վճարովի համակարգում՝ բացառությամբ ավարտական կուրսերի: Վերականգնման կուրսը որոշում է ընդունող հաստատությունը՝ հիմք ընդունելով շրջանավարտի դիպլոմի և հավելվածի բնօրինակը:
Եթե ուսանողին ավարտական փաստաթուղթ շնորհած հաստատությունը կամ մասնագիտությունը ունեն հավատարմագրում, ապա շրջանավարտը կարող է վերականգնվել հենց տվյալ հաստատությունում, իսկ եթե դրա գործունեությունը դադարեցված է, ապա՝ տվյալ մասնագիտության հավատարմագրում ունեցող այլ ուսումնական հաստատությունում:
Հետագա ուսումնառության գործընթացը կարգավորվում է ընդունող հաստատության սահմանած կարգով՝ վերականգնման համար անհրաժեշտ առարկայական տարբերությունների (մինչև 40 կրեդիտ) հանձնման ժամանակացույցով:
Այսպիսով՝ սույն կարգավորումները կապահովեն ոչ պետական չհավատարմագրված բուհերի շրջանավարտների հետագա կրթության և աշխատանքային գործունեության շարունակականությունը: