2 րոպեի ընթերցում
Հայաստանի Հանրապետության վարչապետ Նիկոլ Փաշինյանը հայտարարել է, որ Հայ Առաքելական եկեղեցին այսօր կաթողիկոս չունի:
«Արմենպրես»-ի փոխանցմամբ՝ այս մասին Փաշինյանն ասել է լրագրողների հետ ճեպազրույցում:
«Եթե Կտրիճ Ներսիսյանը երեխա ունի, և այդ երեխան ծնվել է իր՝ կուսակրոնության ուխտը ստանձնելուց հետո, կարո՞ղ է զբաղեցնել Ամենայն հայոց կաթողիկոսի գահը, այս հարցը ինչո՞ւ չի հնչում Հայաստանում: Կտրիճ Ներսիսյանը կաթողիկոս չէ: ՀԱԵ-ն չունի կաթողիկոս, կա մարդ, որն ապօրինի ձևով գտնվում է այդ կարգավիճակում»,- ասաց վարչապետը:
Նիկոլ Փաշինյանը վերահաստատեց նաև Ռուսաստանի և Նոր Նախիջեւանի հայոց թեմի առաջնորդ Տ. Եզրաս արքեպիսկոպոս Ներսիսյանի վերաբերյալ իր պնդումը, որն ավելի վաղ արել էր Ազգային ժողովում:
Փաշինյանն ասել էր, որ Տ. Եզրաս արքեպիսկոպոս Ներսիսյանը КГБ-ի գործակալ է։
«Այն փաստերն ու փաստաթղթերը, որ հրապարակված են, ակնհայտ են դարձնում, որ Խորհրդային Միության ժամանակներից նա հավաքագրվել է որպես ՊԱԿ գործակալ և դա փաստ է»,- ասաց Փաշինյանը:
ՀՀ վարչապետ Նիկոլ Փաշինյանը 2025թ․ հունիսի 10-ին առաջարկել է ստեղծել համակարգող խորհուրդ, որը գործուն քայլեր կձեռնարկի կաթողիկոսական նոր ընտրություններ կազմակերպելու ուղղությամբ։
Ավելի վաղ ՀՀ վարչապետը Ն.Ս.Օ.Օ.Տ. Գարեգին Բ Ամենայն հայոց կաթողիկոսին և մի խումբ բարձրաստիճան հոգևորականների մեղադրել էր կուսակրոնության ուխտը խախտելու մեջ՝ հայտարարելով՝ եթե պարզվի, որ Գարեգին Երկրորդը իսկապես խախտել է իր կուսակրոնության ուխտը և երեխա է ունեցել, նա չի կարողանա լինել Ամենայն հայոց կաթողիկոս։
Եկեղեցականներն էլ իրենց հերթին ՀՀ վարչապետին մեղադրում են հակաեկեղեցական արշավ սկսելու մեջ: