Փաշինյանը հուսով է, որ Էրդողանը կընդունի Երևանում կայանալիք գագաթնաժողովին մասնակցելու հրավերը

Հայաստանի Հանրապետության վարչապետ Նիկոլ Փաշինյանը հույս ունի, որ Թուրքիայի նախագահ Ռեջեփ Էրդողանը կընդունի Երևանում կայանալիք Եվրոպական քաղաքական համայնքի 8-րդ գագաթնաժողովին մասնակցելու հրավերը:

«Արմենպրես»-ի փոխանցմամբ՝ այս մասին Փաշինյանը հայտնեց «Օրբելի ֆորում. կառուցելով խաղաղություն և բազմակողմանի համագործակցություն» խորագիրը կրող միջազգային համաժողովի ընթացքում:

«Վերջին տարիներին նախագահ Էրդողանի հետ շատ հաճախ ենք հանդիպում, ես երկու անգամ Թուրքիա եմ այցելել, այդ թվում՝ առաջին անգամ աշխատանքային այցով եղել եմ Թուրքիայում, և այցը շատ հաջող եմ համարում: Հանդիպման ընթացքում նախագահ Էրդողանին հրավիրել եմ մասնակցելու 2026 թվականի մայիսին Երևանում կայանալիք գագաթնաժողովին: Հույս ունեմ, որ այդ հրավերը կընդունվի»,- ասաց Փաշինյանը:

Փաշինյանի գնահատմամբ՝ Հայաստանի և Թուրքիայի հարաբերությունները  ճիշտ ուղու վրա են՝ և երկու երկրների հարաբերությունների կարգավորումը ժամանակի հարց է:

Եվրոպական քաղաքական համայնքի 8-րդ գագաթնաժողովը կանցկացվի Երևանում, 2026 թվականի մայիսի 4-ին։ Հայաստանի ԱԳ նախարար Արարատ Միրզոյանը հայտնել էր, որ գագաթնաժողովին մասնակցելու համար հայկական կողմը հրավիրել է Թուրքիայի նախագահ Ռեջեփ Թայիփ Էրդողանին և Ադրբեջանի նախագահ Իլհամ Ալիևին։