1 րոպեի ընթերցում
Պարտադիր զինվորական ծառայության ժամկետը 6 ամսով կրճատելու օրենքի նախագիծը հավանություն ստացավ Հայաստանի կառավարության կողմից:
«Արմենպրես»-ի փոխանցմամբ՝ գործադիրի հոկտեմբերի 30-ի նիստում օրենքի նախագիծը ներկայացրեց Պաշտպանության նախարարի տեղակալ Արման Սարգսյանը:
Օրինագծով նախատեսվում է շարքային կազմի 24-ամսյա պարտադիր զինվորական ծառայության ժամկետը 2025 թվականի ձմեռային զորակոչից սկսած կրճատել 6 ամսով՝ սահմանելով 18-ամսյա ժամկետով պարտադիր զինվորական ծառայություն:
«Ներկայում շրջանառության մեջ գտնվող 2025 թվականի ձմեռային զորակոչ հայտարարելու մասին կառավարության որոշման նախագծով նախատեսվում է ձմեռային զորակոչի շրջանակներում զինված ուժերի համալրման բուն գործընթացը սկսել 2026 թվականի հունվարի 7-ից, որի արդյունքում՝ 18-ամսյա ժամկետով ծառայություն են իրականացնելու 2025 թվականի ձմեռային զորակոչից սկսած պարտադիր զինվորական ծառայության զորակոչված քաղաքացիները»,- ասաց Սարգսյանը:
Ծառայության ժամկետի կրճատումը չի տարածվելու 2026 թվականի հունվարի 1-ի դրությամբ պարտադիր զինվորական ծառայության մեջ գտնվող քաղաքացիների վրա:
Օրենքի նախագիծը կուղարկվի Ազգային ժողովի քննարկմանն ու հաստատմանը: