2 րոպեի ընթերցում
Հարավարևելյան Ասիայի պետությունների ասոցիացիան (ԱՍԵԱՆ) և Չինաստանն ստորագրել են ազատ առևտրի գոտու թարմացված համաձայնագիրը: Արարողությունը տեղի է ունեցել Կուալա Լումպուրում ԱՍԵԱՆ-ի գագաթնաժողովի շրջանակներում: «Արմենպրես»-ի փոխանցմամբ՝ այդ մասին հաղորդել է ՏԱՍՍ-ի թղթակցը:
Ստորագրման ժամանակ հայտարարվել է, որ սա նվաճում է, որը ճանապարհ է բացում դեպի «ավելի խորը համագործակցություն, տարածաշրջանային փոխկապակցվածության ամրապնդում և մեր ժողովուրդների ընդհանուր բարգավաճում»:
«Ազատ առևտրի գոտի 3.0»-ի ստեղծման առիթով խորհրդակցությունների ավարտման մասին 2025 թ. հուլիսին հայտարարել էր Չինաստանի արտաքին գործերի նախարար Վան Ին:
ԱՍԵԱՆ-ի գագաթնաժողովը տեղի է ունենում հոկտեմբերի 26-ից 28-ը Կուալա Լումպուրում: Միջոցառման շրջանակներում կազմակերպված են նաև մի շարք այլ հանդիպումներ, այդ թվում՝ «ԱՍԵԱՆ գումարած մեկ» ձևաչափով յոթ գործընկեր երկրներից (Ավստրալիա, Չինաստան, Հնդկաստան, Ճապոնիա, Կորեայի Հանրապետություն, Ռուսաստան և Միացյալ Նահանգներ) յուրաքանչյուրի ներկայացուցիչների հետ, «ԱՍԵԱՆ գումարած երեք» (Չինաստան, Ճապոնիա և Կորեայի Հանրապետություն) և Արևելաասիական գագաթնաժողով:
ԱՍԵԱՆ-ը հիմնվել է 1967 թվականին և, ասոցիացիային Արևելյան Թիմորի անդամակցումից հետո, միավորում է Հարավարևելյան Ասիայի տասնմեկ երկիր՝ Բրունեյ, Վիետնամ, Արևելյան Թիմոր, Ինդոնեզիա, Կամբոջա, Լաոս, Մալայզիա, Մյանմա, Սինգապուր, Թաիլանդ և Ֆիլիպիններ: Ասոցիացիայի առաջին գագաթնաժողովը տեղի է ունեցել 1976 թվականին: 2025 թվականի սկզբից ԱՍԵԱՆ-ի նախագահի լիազորությունները ռոտացիայի սկզբունքով Լաոսից անցել են Մալայզիային: