2 րոպեի ընթերցում
Չինաստանի հարավում գտնվող Գուանդուն նահանգի 151,352 բնակիչ է տարհանվել «Մատմո» կոչված թայֆունի մոտենալու պատճառով։
«Արմենպրես»-ի հաղորդմամբ՝ այս մասին տեղեկացնում է «Սինհուա» գործակալությունը՝ մանրամասնելով, որ թայֆունի պատճառով ուժեղացվել են արտակարգ իրավիճակներին արձագանքման միջոցառումները։
Նշվում է, որ հոկտեմբերի 5-ին առավոտյան Գուանդուն նահանգի ջրհեղեղների դեմ պայքարի շտաբը թայֆունի արտակարգ իրավիճակներին արձագանքման մակարդակը 2-րդ մակարդակից բարձրացրել է 1-ին մակարդակի։
«Մատմո» թայֆունը, որը այս Խաղաղօվկիանոսյան թայֆունների սեզոնի 21-րդ փոթորիկն է, շարժվում է դեպի հյուսիս-արևմուտք մոտավորապես 25 կիլոմետր/ժամ արագությամբ։ Կանխատեսվում է, որ այն կեսօրին կհասնի ափ՝ հասնելով մինչև 45 մետր/վայրկյան արագության։ Ափամերձ քաղաքներում սպասվում են ուժեղ անձրևներ և քամիներ։
Չժանցզյան քաղաքում հոկտեմբերի 4-ի երեկոյից դադարեցվել են դասերը կրթական հաստատություններում, աշխատանքային և արտադրական գործունեությունը, ինչպես նաև երթևեկությունը։
Հոկտեմբերի 5-ի առավոտից բոլոր մայրուղիները նույնպես փակ են եղել երթևեկության համար։ Գուանդուն նահանգի ծովային վարչությունը դադարեցրել է նավագնացությունը վտանգավոր ջրերում, իսկ փրկարարական ծառայությունները ամբողջ տարածաշրջանում բերվել են բարձր պատրաստվածության վիճակի։