Վարդենիս համայնքի ղեկավարը պարգևատրել է բազկամարտի աշխարհի 27-րդ առաջնության կրկնակի չեմպիոն Արա Հովագիմյանին

Գեղարքունիքի մարզի Վարդենիս համայնքի ղեկավար Ահարոն Խաչատրյանը պարգևատրել է  բազկամարտի աշխարհի առաջնության կրկնակի չեմպիոն  Արա Հովագիմյանին։

«Արմենպրես»-ի թղթակցին Վարդենիսի համայնքապետարանի աշխատակազմից տեղեկացրին, որ բազկամարտիկ Արա Հովագիմյանը 2025 թվականի սեպտեմբերի 10-23-ը Բուլղարիայի Ալբենա քաղաքում անցկացված աշխարհի 27-րդ առաջնությունում՝ 50 կգ քաշային կարգում, ձախ և աջ ձեռքերով, արժանացել է աշխարհի կրկնակի չեմպիոնի կոչման։ 

Համայնքի ղեկավարը  շնորհավորել է  երիտասարդ մարզիկին՝ միջազգային հարթակում Հայաստանի անունը բարձր պահելու համար և նրան հանձնել շնորհակալագիր՝ բարձր արդյունքների, նվիրվածության և համայնքի անունը պատվով ներկայացնելու համար: Արա Հովագիմյանն արժանացրել  է նաև դրամական խրախուսանքի:

Մարզիկն իր հաղթանակը նվիրել է  Վարդենիս համայնքից Ղարաբաղյան պատերազմներում զոհված հերոսների հիշատակին։