Գազայի շուրջ Թրամփի ծրագրի իրականացումը կարող է ազդել նաև Ուկրաինայի հակամարտության կարգավորման վրա. Ուիթքոֆ
1 րոպեի ընթերցում
Գազայի հատվածում հրադադարի և իսրայելա-պաղեստինյան հակամարտության դադարեցման՝ ԱՄՆ նախագահ Դոնալդ Թրամփի ծրագրի իրականացումը կարող է ստեղծել խթան, որը կօգնի խաղաղություն բերելու Մերձավոր Արևելքի այլ տարածաշրջաններ, ինչպես նաև կազդի ուկրաինական ճգնաժամի կարգավորման վրա:
«Արմենպրես»-ի փոխանցմամբ՝ այդ մասին Fox News հեռուստաալիքին տված հարցազրույցում հայտարարել է ԱՄՆ նախագահի հատուկ պատվիրակ Սթիվեն Ուիթքոֆը:
«Նախագահը ցանկանում է խաղաղություն ընդհանրապես: Դա վերաբերում է ոչ միայն Գազային, այլև, թե ինչպես այդ խաղաղությունը կարող է տարածվել Մերձավոր Արևելքի բոլոր մյուս շրջանների վրա, այն կարող է տարածվել նույնիսկ Ռուսաստանի և Ուկրաինայի վրա», - ասել է նա՝ մեկնաբանելով Գազայում հակամարտության կարգավորման՝ ԱՄՆ կառավարության կողմից առաջարկվող ծրագիրը:
Ուիթքոֆի խոսքով՝ Թրամփի նախաձեռնությանը հավանություն են տալիս ինչպես Պարսից ծոցի երկրներն, այնպես էլ եվրոպական պետությունները: