368.54
Լիճքի միջնակարգ դպրոցում անցկացվել է «Մայրենի 5» դասագրքին նվիրված մշտադիտարկում և վարպետաց դաս
3 րոպեի ընթերցում
Գեղարքունիքի մարզի Մարտունի համայնքի Լիճք գյուղի միջնակարգ դպրոցում իրենց հերթական մշտադիտարկումներն են անցկացրել «Մայրենի 5» դասագրքի հեղինակները՝ մանկավարժական համալսարանի բանասիրական ֆակուլտետի դեկան Աշոտ Գալստյանը և «Էդիթ Պրինտ» հրատարակչության կրթական ծրագրերի գլխավոր մասնագետ, ՀՀ Գիտությունների ազգային ակադեմիայի մագիստրատուրայի դասախոս Թամարա Թովմասյանը։
Հրավերը նախաձեռնվել է Լիճքի միջնակարգ դպրոցի տնօրեն Անահիտ Ավագյանի կողմից։
«Արմենպրես»-ի թղթակցի հետ զրույցում Թամարա Թովմասյանը նկատեց, որ հանդիպումը ստացվել է ընդգրկուն և բազմաշերտ։ Դասագրքի հեղինակները վարպետաց դաս են վարել 5-րդ դասարանի սովորողների համար, ապա հանդիպել նաև 12-րդ դասարանցիների հետ՝ մասնագիտական կողմնորոշման շրջանակում։
Օրվա ավարտին կազմակերպվել է մասնագիտական քննարկում հայոց լեզու և գրականություն դասավանդող ուսուցիչների հետ՝ փորձի փոխանակման և նոր մոտեցումների ներկայացման նպատակով։ Մանրամասնորեն մեկնաբանություն է տրվել 10-րդ դասարանի «Հայ գրականության» դասավանդման առանձնահատկությունների մասին։ Հանդիպման ընթացքում ուսուցիչներին տրվել են մեթոդական ցուցումներ՝ նոր հանրակրթական պետական չափորոշիչներով դասավանդման առանձնահատկությունների վերաբերյալ։
«Դպրոցի ուսուցչուհի Լիանա Կարապետյանը և ուսուցչի օգնական Մարի Սարգսյանը հանդիպման շրջանակում կազմակերպել էին հետաքրքիր բեմականացում, որն առանձնացավ աշակերտների մտավոր և ստեղծագործական կարողությունների ակտիվ դրսևորումներով, ինչը մեծ ոգևորություն առաջացրեց ինչպես հյուրերի, այնպես էլ մասնակիցների շրջանում։ Հանդիպման մասնակիցները շեշտեցին, որ դասագիրքը դարձել է աշակերտների սիրելի գործընկերն ու բարեկամը, իսկ նման նախաձեռնությունները կարևոր են թե՛ սովորողների , թե՛ ուսուցիչների մասնագիտական առաջընթացի համար»,-նշեց Թամարա Թովմասյանը։
Դպրոցի տնօրեն Անահիտ Ավագյանի խոսքով՝ այսօրինակ միջոցառումները ոչ միայն ակտիվացնում են աշակերտների մասնագիտական հետաքրքրություններն, այլև նպաստում են ուսուցիչների մասնագիտական զարգացմանը։
«Դրանք կամուրջ են ստեղծում դպրոցի և հեղինակների միջև, և մենք վստահ ենք, որ այս համագործակցությունը շարունակական կլինի», - եզրափակեց տնօրենը:
Բաժանորդագրվեք մեր ալիքին Telegram-ում