Կապված է եղել միջանձնային հարաբերությունների հետ, իրավապահները պետք է հետևություն անեն. ԱԺ նախագահը՝ Մերձավանի սպանության մասին
1 րոպեի ընթերցում
Փարաքար համայնքի ղեկավար Վալոդյա Գրիգորյանի սպանությունը կապված չէ քաղաքական որևէ դիրքորոշման հետ:
«Արմենպրես»-ի փոխանցմամբ՝ այս մասին լրագրողների հետ զրույցում ասաց ԱԺ նախագահ Ալեն Սիմոնյանը:
«Բոլոր երկրներում տեղի են ունենում տարբեր դեպքեր, որոնք առնչվում են քաղաքական գործիչներին: Այլ հարց է՝ արդյոք դա քաղաքական ենթատեքստ ունենո՞ւմ է, թե՞ ոչ, արդյոք իշխանությունները դրա հետ որևէ կապ ունե՞ն, թե՞ ոչ: Այո, անկախ նրանից՝ ունեն, թե ոչ, դա ենթադրում է պատասխանատվության աստիճան: Որքան ես գիտեմ, չեմ ուզում պնդել, բայց պարզ է, որ դա միջանձնային հարաբերությունների հետ կապված է եղել: Դա կապված չէ քաղաքական դիրքորոշման հետ»,-ասաց Սիմոնյանը:
ԱԺ նախագահն ընդունեց՝ խնդիրներ կան, իրավապահները պետք է հետևություն անեն:
«Այո, դա խնդիր է: Այն, ինչ տեղի է ունեցել, բացարձակ վատ բան է, բացասական բան է»,-ասաց նա:
ԱԺ նախագահը ևս մեկ անգամ ցավակցեց զոհվածների հարազատներին: Նա ընդգծեց՝ իրավապահները պետք է առնվազն շատ արագ բացահայտեն: