2 րոպեի ընթերցում
Երևանում անցկացվող ՆԱՏՕ ԽՎ 108-րդ Ռոուզ-Ռոթ սեմինարի շրջանակում տեղի ունեցած ճեպազրույցում ՆԱՏՕ ԽՎ ենթահանձնաժողովի նախագահ, Թուրքիայի խորհրդարանի պատգամավոր Ֆաթմա Աքսալն անդրադարձավ հայ-թուրքական հարաբերություններին և հայ-ադրբեջանական խաղաղության գործընթացին։
«Ինչպես գիտեք, Հայաստանի և Թուրքիայի միջև հարաբերություններում նոր գլուխ է բացվում, և մենք ուրախ ենք տեսնել Ադրբեջանի և Հայաստանի միջև ընթացող բանակցությունները։ Ոչ ոք չի շահում պայքարից․ խաղաղությունը ձեռնտու է բոլորին»,- «Արմենպրես»-ի հաղորդմամբ՝ ասաց Աքսալը՝ պատասխանելով լրագրողի հարցին, թե ինչո՞ւ չի բացվում հայ-թուրքական սահմանը և ինչպես է Թուրքիան տեսնում խաղաղության վերջնական հանգուցալուծումը
Նա հիշեցրեց Հայաստանի վարչապետ Նիկոլ Փաշինյանի այցը Թուրքիա և նշեց, որ առաջիկա ամիսներին կարող է ստեղծվել սահմանը բացելու իրական հնարավորություն․
«Կան թռիչքներ, բայց Turkish Airlines-ը դեռ չի թռչում։ Հույս ունենք, որ շուտով դուռը կբացվի, կունենանք առևտրային և մշակութային կապեր։ Սա կարևոր է ոչ միայն Հայաստանի ու Թուրքիայի, այլև ողջ տարածաշրջանի համար»,- ընդգծեց նա։
Աքսալը շեշտեց, որ Հարավային Կովկասում խաղաղության հաստատումը կարող է դառնալ օրինակ աշխարհի համար։
«Տեսնում եք՝ պատերազմները շարունակվում են Ուկրաինայում և Գազայում։ Բայց մենք կարող ենք այստեղ իսկապես լավ օրինակ լինել՝ խաղաղություն հաստատելով մեր տարածաշրջանում և տնտեսական կապեր զարգացնելով։ Երկուսս էլ միայն կշահենք»,- եզրափակեց նա։