Օպերային երգչուհի Ռայնա Կաբաիվանսկան 25-րդ միջազգային վարպետության դասը նշել է գալա համերգով
2 րոպեի ընթերցում
Սոպրանո Ռայնա Կաբաիվանսկան իր 25-րդ միջազգային վարպետության դասը նշել է Սոֆիայի օպերայի և բալետի թատրոնում գալա համերգով՝ Բուլղարիայի Նոր համալսարանի (NBU) հետ համագործակցությամբ:
«Արմենպրես»-ի փոխանցմամբ՝ այս մասին հայտնում են Բուլղարական լրատվական գործակալությունից (BTA):
«Ես շնորհակալ եմ, որ երաժշտության հանդեպ սեր կա»,- միջոցառման ժամանակ ասել է Կաբաիվանսկան:
Սոֆիայի օպերայի և բալետի թատրոնի տնօրեն Պլամեն Կարտալովը Կաբաիվանսկային անվանել է միաժամանակ և ուսուցիչ, և ոգեշնչման աղբյուր, իսկ NBU-ի ռեկտոր պրոֆեսոր Պլամեն Դոյնովը բարձր է գնահատել նրա դերը երիտասարդ երգիչներին համաշխարհային երաժշտական հասարակությանը ծանոթացնելու գործում:
Վարպետության դասի պրոդյուսեր դոկտոր Գեորգի Թեքևն էլ նշել է, որ դպրոցը միանշանակ հաստատել է Սոֆիան համաշխարհային օպերային քարտեզի վրա: Մաեստրո Նայդեն Տոդորովը հավելել է, որ Կաբաիվանսկայի ջանքերն ապահովում են Օպերայի ապագան:
Համերգին արտասահմանցի մասնակիցները արիաներ են կատարել այնպիսի ստեղծագործություններից, ինչպիսիք են «Սևիլյան սափրիչը», «Մակբեթը», «Դոն Կարլոսը», «Ռիգոլետտոն» և «Մադամ Բաթերֆլայը»: Եզրափակչում Կաբաիվանսկայան միացել է մենակատարներին:
Մասնագիտացման շարունակականության և նոր հայտնագործությունների համար շնորհվել են կրթաթոշակներ, իսկ Կաբաիվանսկան ստացել է «Բուլղարիայում բարեգործության զարգացման գործում նշանակալի ներդրում ունեցած մարդ» մրցանակը, ինչպես նաև մշակույթի նախարարության բարձրագույն պարգևը ՝ «Ոսկե դար» վզնոցը:
25-րդ վարպետության դասին մրցանակների համար պայքարել են 30 երկրներից ռեկորդային թվով 140 թեկնածուներ: 2001 թվականին հիմնադրված ծրագիրը հյուրընկալել է 270 վոկալիստների, որոնցից 111-ը ստացել են կրթաթոշակներ Իտալիայում սովորելու համար:
Համերգին բուլղարական BTA լրատվական գործակալության տնօրեն Կիրիլ Վալչևի ուղեկցությամբ ներկա է եղել նաև «Արմենպրես» լրատվական գործակալության տնօրեն Նարինե Նազարյանը։