Լեհաստանը երեք ամսով թռիչքների սահմանափակումներ է մտցնում

Լեհաստանը արևելյան սահմանի երկայնքով երեք ամսով թռիչքների սահմանափակում է մտցնում։ Ինչպես հաղորդում է «Արմենպրես»-ը, այս մասին հաղորդում է Լեհաստանի օդային տրանսպորտի գործակալությունը։

Մասնավորապես, սահմանափակումներ են գործելու Բելառուսի և Ուկրաինայի սահմաններին մոտ հատվածում քաղաքացիական թռիչքների, ինչպես նաև քաղաքացիական անօդաչուների համար։ Սահմանափակումները չեն վերաբերի ռազմական թռչող սարքերին։

Լեհաստանի կոչով ՄԱԿ-ի Անվտանգության խորհուրդը նիստ է գումարելու՝ քննարկելու այդ երկրի օդային տարածքը խախտելու հարցը։ 

Following Poland's request, a UN Security Council emergency meeting will be convened regarding the violation of Polish airspace by Russia.

— Ministry of Foreign Affairs 🇵🇱 (@PolandMFA) September 11, 2025

Լեհական զինված ուժերը սեպտեմբերի 10-ին հայտարարել էին, որ գիշերը «օդային տարածքի աննախադեպ խախտում» է արձանագրվել, Լեհաստանի երկնքում մի քանի անօդաչու թռչող սարքեր են խոցվել։ 

«Ռուսաստանի Դաշնության կողմից Ուկրաինայի տարածքի վրա այսօրվա հարձակման հետևանքով Լեհաստանի օդային տարածքի աննախադեպ խախտում է տեղի ունեցել «դրոն» տեսակի օբյեկտներով։ Սա ագրեսիայի ակտ է, որն իրական սպառնալիք է ստեղծել մեր քաղաքացիների համար», - հայտարարել էին Լեհաստանի բանակի օպերատիվ հրամանատարությունից։