368.59
2 րոպեի ընթերցում
Երևանի հ. 105 մանկապարտեզը ևս հիմնանորոգման ծրագրի ավարտից հետո 110-ի փոխարեն հնարավորություն կունենա ընդունելու շուրջ 220 երեխայի: Ինչպես «Արմենպրես»-ը տեղեկանում է Երևանի քաղաքապետարանից, նախագծի շրջանակում այստեղ էլ ավելացվել են խմբասենյակները՝ 4-ի փոխարեն կձևավորվի 8 խումբ: Տարածքների ընդլայնումն ու արդյունավետ օգտագործումը կիրառվում է հիմնանորոգվող գրեթե բոլոր մանկապարտեզներում, ինչն ավելի շատ երեխաներ ընդունելու հնարավորություն է տալիս:
«2023 թվականից մեկնարկած շինարարության ընթացքում 105 մանկապարտեզում հայտնաբերվել են որոշ թերություններ, ինչի պատճառով Երևանի քաղաքապետարանի կողմից դրանք չեն ընդունվել: Շինարարը պարտավորվել է ամբողջությամբ վերացնել թերությունները. աշխատանքներն ընթացքի մեջ են»,-տեղեկացնում են քաղաքապետարանից:
Մանկապարտեզի հիմնանորոգման նախագծով նախատեսված է նաև բակի բարեկարգում: Այս աշխատանքները կիրականացվեն տարածքով անցնող կոյուղատարի խնդիրը լուծելուց հետո: Բանն այն է, որ հարակից շենքերի կոյուղատար համակարգը ժամանակին անցկացվել է հենց մանկապարտեզի տարածքով, ինչը քայքայված լինելու պատճառով այժմ խնդիրներ է առաջացրել:
Հաշվի առնելով խնդրի հրատապությունն ու մանկապարտեզն օր առաջ շահագործման հանձնելու կարևորությունը՝ Երևանի քաղաքապետարանը նախաձեռնել է ոչ միայն կոյուղատար ցանցի տեղափոխումը, այլև հարակից 15 բազմաբնակարան շենքերն սպասարկող կոյուղատար համակարգի ամբողջական փոխարինումը:
Երևանի հ. 105 մանկապարտեզի հիմնանորոգման ծրագիրն իրագործող ընկերությանն, ի դեպ, կատարված աշխատանքների համար Երևանի քաղաքապետարանն ամբողջությամբ կվճարի միայն վերջնական աշխատանքներն ընդունելուց հետո: