ՀՀ և Վրաստանի ԱԳՆ-ների միջև քաղաքական խորհրդակցություններում քննարկվել են երկկողմ համագործակցության և տարածաշրջանային հարցեր
1 րոպեի ընթերցում
Երևանում անցկացվել են ՀՀ և Վրաստանի արտաքին գործերի նախարարությունների միջև հերթական քաղաքական խորհրդակցությունները՝ ՀՀ ԱԳ նախարարի տեղակալ Վահան Կոստանյանի և Վրաստանի ԱԳ նախարարի տեղակալ Լաշա Դարսալիայի գլխավորությամբ։
Ինչպես «Արմենպրես»-ին տեղեկացրին ՀՀ արտաքին գործերի նախարարությունից, խորհրդակցությունների ընթացքում կողմերն ընդգծել են երկու երկրների միջև ռազմավարական գործընկերային հարաբերությունների շարունակական խորացումը, կարևորել են Հայաստան-Վրաստան բարձր մակարդակի փոխայցերն ու շփումները։
Անդրադարձ է կատարվել երկկողմ տնտեսական համագործակցությանը, զբոսաշրջության, տրանսպորտի, էներգետիկայի, առևտրի և ներդրումների ոլորտներին առնչվող հարցերի լայն շրջանակի, մշակութային, կրթական կապերի ամրապնդմանը, միջազգային կազմակերպություններում համագործակցությանը, իրավապայմանագրային դաշտի ընդլայնմանը:
Ըստ աղբյուրի՝ կողմերը քննարկել են նաև տարածաշրջանային խաղաղությանն ու համագործակցությանն առնչվող հարցեր, որոնց համատեքստում Վահան Կոստանյանն իր գործընկերոջը տեղեկացրել է օգոստոսի 8-ին Վաշինգտոնում ՀՀ-ի, ԱՄՆ-ի և Ադրբեջանի ղեկավարների հանդիպման արդյունքների մասին։