Հիփոթեքային վարկերի աճը դանդաղել է. մարզերում աճն ավելի մեծ է, քան Երևանում

Հայաստանում տրամադրվող հիփոթեքային վարկերի քանակն այս տարվա առաջին կիսամյակում աճել է 4.4 տոկոսով՝ կազմելով շուրջ 1.5 տրլն դրամ, թեև նախորդ տարվա նույն ժամանակահատվածի համեմատ աճը որոշակիորեն դանդաղել է:  

«Արմենպրես»-ի հաղորդմամբ՝ այս մասին ասուլիում հայտնեց Հայաստանի բանկերի միության նախագահ Դանիել Ազատյանը՝ ներկայացնելով 2025-ի առաջին կիսամյակի տվյալները: 

Ինչ վերաբերում է հիփոթեքային վարկերի աճին ՝ միության նախագահը նախ հիշեցրեց, որ անցյալ տարվա առաջին կիսամյակում հիփոթեքային վարկերի աճը եղել է 9.7 տոկոս: 

«Անցյալ տարին տարբերվել է նրանով, որ ամբողջ տարի Երևան քաղաքում գործել է հիփոթեքային վարկի տոկոսադրույքի մարմանն ուղղվող եկամտային հարկի վերադարձի օրենքը: 2024-ին տարեկան կտրվածքով մոտ 30-35 տոկոս հիփոթեքային վարկերի աճ է գրանցվել: Այս տարի 6 ամսվա կտրվածքով հիփոթեքային վարկերն աճել են 4.4 տոկոսով: Կարող ենք ասել, որ վարկերի տրամադրումն ավելի քան 2 անգամ նվազել է բանկերի կողմից: Սա պայմանավորված է Երևանում եկամտային հարկի վերադարձի օրենքի չգործելով»,-ասաց Ազատյանը:

Նա նշեց՝ հիփոթեքային վարկերն աճել են 65 մլրդ դրամով, որից 37 մլրդը աճել է մարզերում, իսկ Երևանում աճել է մոտ 28 մլրդը: Բացարձակ թվով մարզերում աճն ավելի մեծ է: 

«Այնուամենայնիվ, կառուցվածքին նայելիս տեսնում ենք, որ 1.5 տրլն դրամի վարկերից մոտ 400 միլիարդ դրամն է մարզերում, 1.1 տրիլիոնը՝ Երևանում: Այսինքն՝ Երևանում 3 անգամ շատ է»,-ասաց Ազատյանը:

Միության նախագահը նշեց՝ պետք է սպասել և տեսնել, թե հետագայում մարզերում որքանով է ակտիվանալու հիփոթեքային վարկերի տրամադրումը: 

2025 թվականի հունվարի 1-ից հիփոթեքային վարկի տոկոսագումարների մասով վերադարձվող եկամտային հարկի վերադարձն այլևս չի գործում Երևանում, սակայն այն շարունակում է գործել Հայաստանի մարզերում: 2027 թվականից այլևս չի գործի Արագածոտնի, Արմավիրի, Արարատի և Կոտայքի մարզերում: 2029 թվականից եկամտային հարկի վերադարձի համակարգը կդադարի գործել ՀՀ բոլոր մարզերում: Բացառություն կկազմեն միայն սահմանամերձ բնակավայրերը, որոնց ցանկը սահմանում է ՀՀ կառավարությունը: