«Նոթեյշնս» լաբորատորիան կավարտվի Հայաստանի պետական ֆիլհարմոնիայում կազմակերպվող երկօրյա փառատոնով

«Նոթեյշնս» լաբորատորիան կեզրափակվի երկօրյա փառատոնով, որը կանցկացվի Հայաստանի պետական ֆիլհարմոնիայում։ Երկու շաբաթ տևած ինտենսիվ փորձարկումներից և ստեղծագործական փոխանակումներից հետո լաբորատորիան օգոստոսի 2-ին և 3-ին Ֆիլհարմոնիան կվերածի ինստալյացիաների, համերգների և լաբորատորիայում ծնված գեղարվեստական համագործակցությունների կենսունակ տարածքի։

«Արմենպրես»-ի հաղորդմամբ՝ hosq-ի կազմակերպած  «Նոթեյշնս» լաբորատորիան մեկտեղել է ավելի քան 60 արվեստագետի Հայաստանից և 9 այլ երկրից։ Նրանք աշխատել են տարբեր ոլորտներում՝ ձայն, երաժշտություն, վիզուալ արվեստ, անիմացիա, վիդեո արվեստ և արհեստական բանականություն՝ ուսումնասիրելով հայկական դասական երաժշտության ժառանգության և նորարարության հատման կետերը։ 

Հիմնվելով Armenian National Music-ի թվայնացրած Ավետ Տերտերյանի 3-րդ սիմֆոնիայի վրա՝ մասնակիցները արխիվային հայկական դասական երաժշտությունն օգտագործել են  նոր գեղարվեստական փորձարկումների համար։   13 օրվա ընթացքում արվեստագետները զբաղվել են համատեղ հետազոտություններով, իմպրովիզացիայով և փորձարկումներով՝ ընդլայնելով ձայնի և ձևի հնարավորությունները։ «Նոթեյշնս»-ը ոչ միայն վերաիմաստավորել է հայկական երաժշտական ժառանգությունը, այլև ստեղծարար առումով վերափոխել Հայաստանի պետական ֆիլհարմոնիան՝ միջոլորտային արտահայտման նոր ձևաչափերով։

«Նոթեյշնս» փառատոնը կներկայացնի լաբորատորիայում ստեղծված աշխատանքների ամբողջ սպեկտրը՝ ինստալյացիաները, ձայնային փորձարկումները, մուլտիմեդիա արվեստի գործերը և կենդանի համերգները։ Այցելուները կտեսնեն անսպասելի գեղարվեստական հիբրիդներ, որոնք կխամրեցնեն միջոցների միջև սահմանները և կվերաիմաստավորեն մշակութային ժառանգության դերը ժամանակակից ստեղծագործության մեջ։

«Լաբորատորիան գործում է որպես էկոհամակարգ։ Իմպուլսներն ի հայտ են գալիս ներսից և դրսից։ Համադրողները, փորձագետները, մասնագետները հավասարակշռություն են պահպանում ճկուն կառուցվածքի շրջանակներում։ Նրանք ռիսկի են դիմում։ Նրանք իմպրովիզներ են կատարում՝ հասնելու մեր ներուժից ավելիին»,-նշում են լաբորատորիայի և փառատոնի կազմակերպիչները։