1 րոպեի ընթերցում
Հնդկաստանի Հիմաչալ Պրադեշի նահանգում ուժգին ջրհեղեղներից, ամպրոպից և սողանքներից, ենթադրաբար, տասնյակ մարդիկ են զոհվել, 30 մարդ անհետ կորած է։ «Արմենպրես»-ի փոխանցմամբ՝ այս մասին հայտնում է The Independent պարբերականը։
Անհետ կորածներին գտնելու նպատակով որոնողափրկարարական աշխատանքներ են տարվում անօդաչու թռչող սարքերի և տարբեր արձագանքման ուժերի անձնակազմի 250 անդամների մասնակցությամբ։
Հնդկաստանի օդերևութաբանական վարչությունը կանխատեսել է շարունակական տեղատարափ անձրևներ նահանգի մի քանի շրջաններում, ինչը մտահոգություններ է առաջացնում հետագա ջրհեղեղների և սողանքների վերաբերյալ: Նահանգի առանձին վայրերում մինչև հուլիսի 10 հայտարարվել է հորդառատ անձրևների մասին դեղին մակարդակի նախազգուշացում:
Ամենաշատ տուժած շրջաններից մեկը Մանդին է, որտեղ նախորդ շաբաթ տեղի ունեցած 10 ամպրոպի հետևանքով մեկ օրում 14 մարդ է մահացել, գրանցվել են զանգվածային ավերածություններ։
Տարածաշրջանում տեղի ունեցած ջրհեղեղների, սողանքների և ամպրոպների հետևանքով հունիսի 20-ից ի վեր զոհվել է առնվազն 80 մարդ։
Հարյուրավոր տներ, խանութներ, ճանապարհներ և կամուրջներ են ավերվել, ավելի քան 240 ճանապարհներ ներկայում փակ են, մասնավորապես՝ ամենաշատ տուժած Մանդիի շրջանում։