Զանգվածային դրոնային հարձակումներ Ուկրաինայում և ՌԴ-ում. Խարկովում տուժել է 11 մարդ, Կիևում մեկ անձ մահացել է
2 րոպեի ընթերցում
Հուլիսի 5-ի գիշերը Ուկրաինան և Ռուսաստանը դարձել են անօդաչու թռչող սարքերի լայնածավալ կիրառման թիրախ։ Ինչպես հաղորդում է «Արմենպրես»-ը՝ հղում անելով Ուկրաինայի և Ռուսաստանի պաշտպանական գերատեսչություններին, միմյանց ուղղությամբ արձակվել են հարյուրավոր դրոններ։
Ուկրաինայի զինված ուժերի օդային ուժերի հայտարարության համաձայն՝ Ռուսաստանը գիշերը կիրառել է 322 անօդաչու թռչող սարք, որոնցից 292-ն չեզոքացվել են․ 157-ը խոցվել են, իսկ 135-ը՝ ճնշվել ռադիոէլեկտրոնային պայքարի միջոցներով։ Հիմնական հարվածը հասցվել է Խմելնիցկիի շրջանին և Ստարոկոնստանտինով քաղաքին, որտեղ տեղակայված է ռազմաօդային բազա։
Ռուսաստանի պաշտպանության նախարարությունը հայտնել է, որ իրենց զինված ուժերը խոցել են 94 ուկրաինական անօդաչու թռչող սարք երկրի 15 մարզի օդային տարածքում։ Հարձակումներ են գրանցվել Վորոնեժի, Բրյանսկի, Բելգորոդի, Սարատովի, Կուրսկի, Լենինգրադի, Օրյոլի, Ռոստովի, Ռյազանի, Սմոլենսկի, Մոսկվայի, Պենզայի, Տուլայի, Նովգորոդի մարզերում, ինչպես նաև Չուվաշիայում։
Ուկրաինայի Զինված ուժերի գլխավոր շտաբը հաղորդել է, որ հարված է հասցվել Վորոնեժի մարզի «Բորիսոգլեբսկ» ռազմական օդանավակայանին, որտեղ տեղակայված են Սու-34, Սու-35Ս և Սու-30ՍՄ կործանիչներ։ Ըստ հաղորդագրության՝ ոչնչացվել են ավիառումբերի պահեստ, ուսումնամարտական ինքնաթիռ, ինչպես նաև ենթադրյալ օդային թիրախներ։
Սարատովի մարզում հարվածներ են հասցվել Էնգելսի ռազմավարական օդանավակայանի տարածքին․ վնասվել են բնակելի շենքեր, տուժածներ չկան։ Չուվաշիայում արձանագրվել է երկու դրոնի հարձակում, որոնցից մեկն ընկել է գիտահետազոտական հաստատության տանիքին։
Մինչդեռ, ռուսական դրոնների հարվածների հետևանքով Ուկրաինայի Խարկովի մարզի Չուգուև քաղաքում տուժել է 11 մարդ։ Կիևում հուլիսի 4-ին գրանցված հարձակման հետևանքով մահացել է 35-ամյա տղամարդ, ինչպես հաղորդել է քաղաքապետ Վիտալի Կլիչկոն։