Իրանի միջուկային օբյեկտների ռմբակոծությունից հետո Հայաստանի հարավային շրջաններում բնական ռադիոակտիվ ֆոնի փոփոխություն չի արձանագրվել
2 րոպեի ընթերցում
Իրանի միջուկային օբյեկտների ռմբակոծություններից հետո Միջուկային և ռադիացիոն անվտանգության գիտատեխնիկական կենտրոնի մասնագետները շտապ մեկնել են Սյունիքի մարզ՝ դոզիմետրիկ չափումներ իրականացնելու նպատակով։
«Արմենպրես»-ի փոխանցմամբ՝ այս մասին հաղորդագրություն է տարածել Միջուկային և ռադիացիոն անվտանգության գիտատեխնիկական կենտրոնը։
Նշվում է, որ չափումները կատարվել են մի շարք բնակավայրերում, այդ թվում՝ Մեղրի, Ագարակ և Քաջարան համայնքներում։
Այս պահին Հայաստանի հարավային շրջաններում բնական ռադիոակտիվ ֆոնի որևէ փոփոխություն չի արձանագրվել։
Միջուկային և ռադիացիոն անվտանգության գիտատեխնիկական կենտրոնը շարունակում է իրականացնել իրավիճակի մշտական մոնիթորինգ։
Իսրայելը հունիսի 13-ի վաղ առավոտից հարվածներ էր հասցրել Իրանի տարածքին՝ թիրախավորելով երկրի միջուկային և ռազմական օբյեկտները։ Ավելի ուշ ՄԱԿ-ի Անվտանգության խորհրդի հրատապ նիստի ընթացքում Ատոմային էներգիայի միջազգային գործակալության տնօրեն Ռաֆայել Գրոսին հայտարարել էր, որ Իսրայելի հարվածների հետևանքով Նաթանզի միջուկային կայանի վերգետնյա հատվածը իսրայելական հարվածների հետևանքով ոչնչացվել է։ Հունիսի 13-ի երեկոյան նաև լուրեր տարածվեցին, որ Ադրբեջանը Իրանի հետ սահմանին ստուգել է ռադիացիայի մակարդակը։