368.54
«Մայր Հայաստան» ռազմական պատմության թանգարանը կդառնա Հայաստանի պատմության թանգարանի մասնաճյուղ
2 րոպեի ընթերցում
Հայաստանի պաշտպանության նախարարության ենթակայությամբ գործող «Մայր Հայաստան» ռազմական պատմության թանգարանը կվերակազմակերպվի և կդառնա «Հայաստանի պատմության թանգարան» ՊՈԱԿ-ի մասնաճյուղ։
«Արմենպրես»-ի հաղորդմամբ՝ որոշումը հաստատվեց կառավարության հունիսի 5-ի նիստում։
Նախագծի ընդունումը նպատակ ունի ապահովել թանգարանի արդյունավետ գործունեությունը՝ առանց առանձին իրավաբանական անձի ստեղծման անհրաժեշտության։
Ինչպես նշվում է հիմնավորման մեջ, գործող թանգարանն իր հիմնադրման՝ 2016 թվականի ապրիլից ի վեր, զբաղվում է հայկական ռազմական արվեստի և պատմության մասին ցուցադրական նյութերի համալրմամբ, հաշվառմամբ, պահպանմամբ ու հանրայնացմամբ։ Թանգարանի վերակազմակերպման նախաձեռնությունն ուղղված է այս գործունեության շարունակականությանն ու արդյունավետ կառավարմանը՝ պետական ոչ առևտրային կազմակերպությունների գործունեության շրջանակում։
Նախագծով սահմանվում է, որ «Մայր Հայաստան» ռազմական պատմության թանգարանը միացվելու է «Հայաստանի պատմության թանգարան» ՊՈԱԿ-ին՝ վերջինիս կազմում դառնալով առանձին մասնաճյուղ։ Միաժամանակ կարգավորվում են նաև անշարժ և շարժական գույքի ամրացման, հատկացման և օգտագործման իրավունքի հետ կապված հարաբերությունները։
Բաժանորդագրվեք մեր ալիքին Telegram-ում