2 րոպեի ընթերցում
Թուրքիայի ափամերձ Մարմարիս քաղաքում հունիսի 3-ին 5,8 մագնիտուդով երկրաշարժ է տեղի ունեցել, որը խուճապ է առաջացրել բնակիչների շրջանում։ Տասնյակ մարդիկ վիրավորվել են պատուհաններից կամ պատշգամբներից ցատկելու հետևանքով, մեկ դեռահաս մահացել է հիվանդանոց տեղափոխվելուց հետո։ Լուրջ վնասների մասին տեղեկություններ չեն հաղորդվել։ «Արմենպրես»-ի փոխանցմամբ՝ այս մասին հայտնում է The Associated Press-ը։
Աղետների և արտակարգ իրավիճակների կառավարման վարչությունը հայտնել է, որ երկրաշարժը տեղի է ունեցել ժամը 2:17-ին, էպիկենտրոնը գտնվել է Միջերկրական ծովում՝ Մարմարիս զբոսաշրջային քաղաքի մոտակայքում: Այն զգացվել է հարևան շրջաններում, այդ թվում՝ հունական Հռոդոս կղզում։
Թուրքիայի ներքին գործերի նախարար Ալի Երլիքայան X հարթակում հայտարարել է, որ 14-ամյա մի աղջիկ տեղափոխվել է հիվանդանոց և մահացել այնտեղ՝ խուճապային նոպայի պատճառով: Հայտնի չէ, թե արդյոք նա որևէ քրոնիկ հիվանդություն ուներ, թե ոչ։
Նախարարը նշել է, որ գրեթե 70 մարդ բուժօգնություն են ստացել պատուհաններից կամ պատշգամբներից խուճապահար ցատկելուց հետո ստացած վնասվածքներից: Նա հավելել է, որ շենքերի վնասման մասին տեղեկություններ չեն եղել։
Թուրքիան գտնվում է սեյսմիկ գոտում, և այնտեղ երկրաշարժեր հաճախակի են տեղի ունենում։ 2023 թվականին 7,8 մագնիտուդով երկրաշարժը Թուրքիայում խլել էր ավելի քան 53 000 մարդու կյանք և ավերել կամ վնասել հարյուր հազարավոր շենքեր հարավային և հարավարևելյան 11 նահանգներում։ Եվս 6 000 մարդ զոհվել էր հարևան Սիրիայի հյուսիսային մասերում։