Նախաքննության արդյունավետության բարձրացման նպատակով Հակակոռուպցիոն կոմիտեիում կատարվել են կառուցվածքային փոփոխություններ
2 րոպեի ընթերցում
Հայաստանի հակակոռուպցիոն կոմիտեի նախագահի՝ 2025 թվականի մայիսի 19–ի հրամանով կառուցվածքային փոփոխություններ են կատարվել Կոմիտեի կազմում, որի արդյունքում ստեղծվել են նախաքննական հետևյալ վարչություններ: «Արմենպրես»-ի փոխանցմամբ՝ Կոմիտեից հայտնում են, որ վերոնշյալ փոփոխությունները կատարվել են նախաքննության արդյունավետության բարձրացման և գործառույթների հստակեցման նպատակով:
- Արդարադատության շահերի դեմ ուղղված, ինչպես նաև իրավապահ մարմինների ծառայողներին վերագրվող հանցագործությունների քննության վարչություն։
- ·Տնտեսական գործունեության դեմ ուղղված կոռուպցիոն բնույթի հանցագործությունների քննության վարչություն։
- Հանրային ծառայության շահերի դեմ ուղղված կոռուպցիոն բնույթի հանցագործությունների քննության վարչություն։
- Սեփականության դեմ ուղղված կոռուպցիոն բնույթի հանցագործությունների քննության վարչություն։
- Անդրազգային, ինչպես նաև կոռուպցիոն այլ բնույթի հանցագործությունների քննության վարչություն։
- Ընտրական, ինչպես նաև մասնավոր ոլորտում կոռուպցիոն բնույթի հանցագործությունների քննության վարչություն։
Փոփոխության արդյունքում վերը նշվածից բացի, ստեղծվել է ներքին անվտանգության և վերահսկողության վարչություն, որին, ի թիվս այլնի, վերապահվել են քրեական վարույթներով դատավարական իրավունքների և պարտականությունների, ինչպես նաև օպերատիվ–հետախուզական գործունեության իրականացման արդյունավետությունը գնահատելու և գործնական օգնություն ցուցաբերելու նպատակով համապատասխան ուսումնասիրություններ իրականացնելու, ինչպես նաև առաքինության ստուգման լիազորություններ։
Հակակոռուպցիոն կոմիտեից ընդգծում են, որ սա կառուցվածքային բարեփոխումների շարունակական գործընթացի մասն է, որը նպատակ ունի ապահովել համակարգային զարգացման նոր փուլ և բարձրացնել կոռուպցիայի դեմ պայքարի արդյունավետությունը։