Եկամուտների հայտարարագրման վերաբերյալ իրազեկման հանդիպումները կանցկացվեն նաև առցանց ձևաչափով. ՊԵԿ

Շարունակվում են ֆիզիկական անձանց տարեկան եկամուտների հայտարարագրման վերաբերյալ իրազեկման հանդիպումները հարկ վճարողների հետ։ «Արմենպրես»-ի փոխանցմամբ՝ այս մասին հայտնում են Պետական եկամուտների կոմիտեից: 

Մասնավորապես, ՊԵԿ հարկ վճարողների սպասարկման վարչության ներկայացուցիչների կողմից 2025 թվականի փետրվարից Երևանում և մարզերում անվճար իրականացվում են եկամուտների հայտարարագրման վերաբերյալ իրազեկման հանդիպումներ։ Իրազեկումների նպատակն է՝ աջակցել ֆիզիկական անձանց տարեկան եկամուտների հայտարարագրման գործընթացի պատշաճ կազմակերպման հարցում, ինչպես նաև  բարձրացնել իրազեկվածության մակարդակը։

Կոմիտեն, միաժամանակ, հայտնում է՝ եթե իրազեկմանը մասնակցելու է 50 և ավելի քաղաքացի, ապա.

• Հանդիպումներն անցկացվում են կազմակերպության կողմից առաջարկվող տարածքում։ Իրազեկման աշխատանքները պատշաճ իրականացնելու և համապատասխան նյութերն ու ուղեցույցները ցուցադրելու նպատակով անհրաժեշտ է կազմակերպության տարածքում ապահովել համակարգչի, ինտերնետի և պրոյեկտորի առկայություն: Իսկ մասնակցության համար անհրաժեշտ է նամակ ուղարկել HVSV3@taxservice.am էլ. փոստին՝ նշելով տվյալ կազմակերպության անվանումը և հասցեն, կոնտակտային անձի տվյալները։
• Առցանց ձևաչափով (Google Meet կամ Microsoft Teams հավելվածների միջոցով) իրազեկման հանդիպումներն անցկացնելու համար անհրաժեշտ է մասնակցության վերաբերյալ նամակ ուղարկել HVSV6@taxservice.am էլ. փոստին՝ նշելով կազմակերպության անվանումը, կոնտակտային անձի տվյալները և առցանց տարբերակը։
• Այն քաղաքացիները, որոնք ցանկանում են Երևանում  և մարզերում մասնակցել իրազեկման հանդիպումներին (Երևանում կանցկացվեն ՊԵԿ ուսումնական դահլիճներում՝ Կոմիտաս 35, Ահարոնյան 12/3 հասցեներում, իսկ մարզերում՝ համապատասխան դահլիճներում), կարող են նամակ ուղարկել HVSV14@taxservice.am հասցեին՝ նշելով մասնակիցների տվյալները, ինչպես նաև այն հասցեն կամ մարզը, որտեղ ցանկանում են մասնակցել իրազեկման միջոցառումներին։

ՊԵԿ-ը տեղեկացնում է, որ ֆիզիկական անձանց եկամուտների հայտարարագրման վերաբերյալ հարցերի դեպքում քաղաքացիները կարող են դիմել նաև ՊԵԿ հարկ վճարողների սպասարկման վարչության ցանկացած սպասարկման բաժին՝  երկուշաբթիից ուրբաթ՝ 09:00-18:00-ն (առանց ընդմիջման)։