1 րոպեի ընթերցում
ԱՄՆ առևտրի նախարարությունը հաստատել է արևային պանելների ներմուծման նոր մաքսատուրքերը Հարավարևելյան Ասիայի չորս երկրներից՝ Կամբոջայից, Վիետնամից, Մալայզիայից և Թաիլանդից։ «Արմենպրես»-ի հաղորդմամբ՝ մաքսատուրքերը կկիրառվեն համաշխարհային խոշոր արտադրողների նկատմամբ։
ԱՄՆ առևտրի նախարարության եզրակացությամբ՝ նշված երկրների արտադրողները օգտվել են պետական սուբսիդիաներից և արտադրանքը մատակարարել են ԱՄՆ շուկա՝ արտադրության ինքնարժեքից ցածր գներով, ինչը համարվել է անարդար մրցակցություն։
Մաքսատուրքերի չափերը տարբեր են՝ կախված արտադրող ընկերությունից և երկրից։
Bloomberg-ի տվյալներով՝ Կամբոջայից որոշ մատակարարների համար սահմանվել է մինչև 3521 տոկոս սակագին, Մալայզիայից՝ 34.4 տոկոս, Վիետնամից՝ 395.9 տոկոս, Թաիլանդից՝ 375.2 տոկոս։
Bloomberg-ը գնահատում է, որ միայն 2024 թվականին այս չորս երկրներից ԱՄՆ ներմուծվել է արևային պանելների սարքավորումներ՝ ընդհանուր առմամբ 12.9 միլիարդ դոլարի ծավալով, ինչը կազմում է երկրի այս ապրանքների ներմուծման շուրջ 77 տոկոսը։
Մաքսատուրքերի սահմանման վերաբերյալ վերջնական որոշումը դեռ պետք է կայացնի ԱՄՆ միջազգային առևտրի հանձնաժողովը, որի նիստը նախատեսված է 2025 թվականի հունիսին։