2 րոպեի ընթերցում
ԱՄՆ-ի և Իրանի միջև բանակցային գործընթացը նոր թափ է ստանում և հնարավոր է դարձնում նույնիսկ անհավանականը:
«Արմենպրես»-ի փոխանցմամբ՝ այս մասին ԱՄՆ-ի և Իրանի միջև բանակցությունների երկրորդ փուլից հետո X-ի հարթակում գրառում է կատարել Օմանի արտաքին գործերի նախարար Բադր ալ-Բուսաիդին։
«Ցանկանում եմ շնորհակալություն հայտնել Իրանի արտաքին գործերի նախարար Աբբաս Արաղչիին և ԱՄՆ նախագահի բանագնաց պարոն Սթիվեն Ուիթքոֆին բանակցություններին իրենց բարձր կառուցողական մոտեցման համար: Այս բանակցությունները նոր թափ են ստանում, և այժմ նույնիսկ քիչ հավանականը դառնում է հնարավոր»,- նշել է Օմանի ԱԳ նախարարը։
Իր հերթին, Իրանի արտգործնախարար Աբբաս Արաղչին X-ի հարթակում կատարած գրառման մեջ նշել է, որ Իտալիայում ԱՄՆ-ի հետ անուղղակի բանակցություններում համեմատաբար դրական մթնոլորտն առաջընթաց է գրանցել հնարավոր համաձայնագրի սկզբունքների շուրջ։
«Հռոմում համեմատաբար դրական մթնոլորտը հնարավորություն է տվել առաջընթացի հասնել հնարավոր գործարքի սկզբունքների և նպատակների շուրջ»,-նշել է Արաղչին:
«Առայժմ լավատեսությունը կարող է արդարացված լինել, բայց միայն մեծ զգուշությամբ», - նշել է նա:
Իրանի և ԱՄՆ-ի միջև Օմանի միջնորդությամբ Իտալիայի մայրաքաղաքում անցկացված անուղղակի բանակցությունների նոր փուլը տեղի է ունեցել ապրիլի 19-ին։
Երկու կողմերի պատվիրակությունները՝ Իրանի ԱԳ նախարար Արաղչիի և ԱՄՆ նախագահի հատուկ բանագնաց Սթիվ Ուիտքոֆի գլխավորությամբ բանակցություններ են վարել Հռոմում Օմանի դեսպանի նստավայրում։
Կողմերը համաձայնություն են ձեռք բերել փորձագետների մակարդակով տեխնիկական բանակցություններ սկսել Օմանում ապրիլի 23-ին: