Հարավային Կովկասն ունի զարգացման հսկայական ներուժ, որի իրագործման համար անհրաժեշտ է ունենալ կայուն, հարատև խաղաղություն. Վրաստանի ԱԳ նախարար
2 րոպեի ընթերցում
Վրաստանը կարող է հարթակ լինել Հայաստանի և Ադրբեջանի համար, որպեսզի քննարկվեն խնդրահարույց հարցերն ու գտնվեն դրանց լուծումները։ «Արմենպրես»-ի հաղորդմամբ՝ իր երկրի դիրքորոշումը ևս մեկ անգամ հաստատեց Վրաստանի արտգործնախարար Մակա Բոչորաշվիլին՝ Հայաստանի, Վրաստանի և Ադրբեջանի ԱԳ նախարարների մասնակցությամբ Անթալիայում կայացած պանելային քննարկման ժամանակ:
Նա ընդգծեց, որ Վրաստանը հանձնառու է ապագայում նույնպես տրամադրել գործիքներ ու հնարավորություններ արդյունավետ համագործակցության համար:
Վրաստանի ԱԳ նախարարի պնդմամբ՝ Վրաստանի համար խաղաղ տարածաշրջանը միանշանակ հիմնական առաջնահերթությունն է, առավել ևս, որ Հարավային Կովկասն ունի զարգացման հսկայական ներուժ, որի իրագործման համար անհրաժեշտ է ունենալ կայուն, հարատև խաղաղություն։
«Մենք ողջունում ենք խաղաղության պայմանագրի բովանդակության համաձայնեցումը Հայաստանի և Ադրբեջանի միջև։ Փաստաթղթի ստորագրումն իսկապես կլինի մեծ նվաճում։ Մենք պետք է ավելի զարգացնենք պատմականորեն և ավանդաբար ձևավորված լավ հարաբերությունները Վրաստանի և նրա երկու հարևանների միջև, մանավանդ որ նրանց հետ արդեն իսկ ձևավորել ենք ռազմավարական մակարդակի փոխգործակցություն, ինչը Վրաստանի մեծ ներդրումն է տարածաշրջանում։ Անդրկովկասյան բոլոր երկրների մոտ նկատվում է համագործակցելու քաղաքական կամքը»,- շեշտեց Բոչորաշվիլին։