1 րոպեի ընթերցում
Մյանմայում 7,7 մագնիտուդով ավերիչ երկրաշարժի հետևանքով զոհերի թիվը հասել է 3645-ի, 5017 մարդ վիրավորվել է, ևս 148-ը դեռևս անհետ կորած են համարվում: «Արմենպրես»-ի փոխանցմամբ՝ այս մասին հայտնել է China News լրատվականը։
Մյանմայի օդերևութաբանության և հիդրոլոգիայի վարչության տվյալներով՝ մարտի 28-ին տեղի ունեցած ավերիչ երկրաշարժից հետո Մյանմայում տեղի է ունեցել նաև 98 հետցնցում, որոնց ուժգնությունը տատանվել է 2,8-ից 7,5 մագնիտուդի սահմաններում: Շենքերի ավելի քան 80 տոկոսը վնասվել է, հատկապես Սագայինգ, Մանդալայ և Մագուեյ խոշոր քաղաքներում:
Մարտի 28-ին Մյանմայում տեղի է ունեցել երկու հզոր երկրաշարժ՝ համապատասխանաբար 7,7 և 6,4 մագնիտուդով։ Երկրաշարժի էպիկենտրոնը գտնվել է Մյանմայի մեծությամբ երկրորդ քաղաքի՝ Մանդալայի մոտակայքում: Այն ավերել է հազարավոր շենքեր, ճեղքել ճանապարհներ և քանդել կամուրջներ։
Ցնցումները զգացվել են նաև հարևան Թաիլանդում, ինչպես նաև Չինաստանում, Կամբոջայում, Բանգլադեշում և Հնդկաստանում։