Եգիպտոսի, Հորդանանի և Ֆրանսիայի ղեկավարները կոչ են արել վերականգնել Գազայի հատվածի հունվարյան համաձայնագիրը
1 րոպեի ընթերցում
Եգիպտոսի նախագահ Աբդել Ֆաթթահ Ալ-Սիսին, նրա ֆրանսիացի գործընկեր Էմանուել Մակրոնը և Հորդանանի թագավոր Աբդալլահ Երկրորդը կոչ են արել վերականգնել Գազայի հատվածում հունվարի 19-ից ուժի մեջ մտած հրադադարը։
Ինչպես հաղորդում է «Արմենպրես»-ը, վկայակոչելով «ՏԱՍՍ»-ը, այս մասին ասվում է Կահիրեում կայացած հանդիպման արդյունքներով ընդունված հռչակագրում։
«Գազայի հատվածի վրա Իսրայելի վերսկսված հարվածների ֆոնին մենք կոչ ենք անում անհապաղ վերականգնել հրադադարը և իրականացնել հունվարի 19-ին ուժի մեջ մտած համաձայնագիրը»,- ասվում է փաստաթղթում։ Երկրի ղեկավարներն ընդգծել են, որ հունվարին ստորագրված համաձայնագիրը երաշխավորել է իսրայելցի պատանդների և պաղեստինցի բանտարկյալների ազատ արձակումն ու անվտանգությունը։
Եգիպտոսի, Հորդանանի և Ֆրանսիայի ղեկավարները նաև մտահոգություն են հայտնել Հորդանան գետի արևմտյան ափին և Արևելյան Երուսաղեմում հումանիտար իրավիճակի վատթարացման կապակցությամբ և ընդգծել Երուսաղեմի սրբավայրերի պատմական ստատուս քվոն հարգելու անհրաժեշտությունը։
