Կառավարությունը նպաստ կտրամադրի Լոս Անջելեսի Օլիմպիական խաղերին նախապատրաստվող մարզիկներին և մարզիչներին

Հայաստանի կառավարությունը նախատեսում է հաստատել սպորտային նպաստի տրամադրման նոր կարգ՝ «Լոս Անջելես 2028» ամառային օլիմպիական խաղերին նախապատրաստվող մարզիկների, հավաքականների մարզիչների, անձնական մարզիչների, բժիշկների և մերսողների համար։ «Արմենպրես»-ի հաղորդմամբ՝ նախագիծը մշակվել է՝ հիմնվելով «Ֆիզիկական կուլտուրայի և սպորտի մասին» օրենքի համապատասխան դրույթների վրա։ Այն նախատեսում է 2026 թվականի հունվարից մինչև 2028 թվականի օգոստոսն ընկած ժամանակահատվածում պետական աջակցություն տրամադրել այն անձանց, ովքեր ըստ սահմանված չափանիշների կներգրավվեն Օլիմպիական խաղերի նախապատրաստական փուլում։

Նախագծով նախատեսված է, որ սպորտային նպաստը կտրամադրվի՝ ելնելով մարզիկների և մարզչական անձնակազմի արձանագրած մրցութային արդյունքներից։ Փարիզ 2024 Օլիմպիական խաղերին նախապատրաստվելու փորձը, որի ընթացքում Հայաստանի մարզիկները նվաճել են չորս մեդալ՝ երեք արծաթե և մեկ բրոնզե, հիմք է հանդիսացել այս գործընթացի շարունակականության համար։

Նախագիծը համապատասխանում է ՀՀ կառավարության ծրագրին և «Հայաստանի վերափոխման ռազմավարություն 2050»-ին, որտեղ ամրագրված է՝ խթանել միջազգային մարզական նվաճումները և հասնել 25 օլիմպիական ոսկե մեդալի։ Ըստ հաշվարկների՝ նոր ծրագրի տարեկան ծախսը կկազմի մոտ 292.2 միլիոն դրամ, սակայն պետական բյուջեի ծախսերի կամ եկամուտների զգալի փոփոխություն չի ակնկալվում։

Որոշման նախագիծը, եթե ընդունվի, ուժի մեջ կմտնի 2026 թվականի հունվարի 1-ից։